Blikar búnir að vinna sjö leiki í röð á gervigrasi

Blikar unnu Stjörnuna 3-1 í Pepsi Max deildinni í gærkvöldi og hafa þar með unnið sjö leiki í röð á gervigrasi hvort sem það eru deildarleikir eða leikir í Evrópukeppni.

Það sem meira er að markatala Blika í þessum sjö síðustu gervigrasleikjum er átján mörk í plús eða 22 mörk á móti 4. Þeir eru því búnir að skora 3,14 mörk í leik í leikjunum sjö.

Það gengur ekki eins vel á grasvöllunum því Blikar hafa ekki unnið grasleik síðan þeir sóttu sigur til Lúxemborgar í fyrstu umferð Evrópukeppninnar 8. júlí síðastliðinn. Í þeim leik lentu þeir 2-0 undir á móti Racing FC Union en tókst að komast til baka og vinna 3-2 sigur.

Blikar eru síðan án sigurs í fjórum síðustu grasleikjum sínum og meðal þeirra er fyrri leikurinn á móti Aberdeen á Laugardalsvellinum í síðustu viku. Liðin mætast síðan aftur á grasinu á Pittodrie leikvanginum á fimmtudaginn.

Blikar duttu líka út úr bikarnum eftir 2-0 tap í framlengingu á móti Keflavík á grasvellinum í Keflavík.

En þegar þeir spila á gervigrasi þá virðast fáir ráða við þá þessa dagana. Síðasti til að vinna þá á gervigrasi voru Valsmenn 16. júní síðastliðinn.