Stærð­fræðidoktor vann fyrsta ÓL-gull Austur­ríkis í hjól­reiðum í meira en öld

Anna Kiesenhofer endaði langa bið Austurríkismanna eftir Ólympíugulli á sumarleikum þegar hún vann götuhjólreiðar kvenna á Ólympíuleikunum í Tókýó.

Austurríkismenn höfðu ekki unnið gull á sumarleikum síðan í Aþenu 2004 þar til að Kiesenhofer fagnaði sigri.

Þetta var enn fremur fyrsta Ólympíugull Austurríkis í meira en heila öld eða síðan þeir eignuðust Ólympíumeistara á leikunum 1896. Adolf Schmal vann þá tólf tíma hjólreiðakeppni.

Hin þrítuga Kiesenhofer er doktor í stærðfræði frá Polytechnic háskólanum í Katalóníu en hún kláraði námið árið 2016. Hún gerðist ekki atvinnumaður fyrr en árið eftir.

Kiesenhofer keppti í þríþraut og tvíþraut frá 2011 til 2013 en varð að leggja hlaupin á hilluna árið 2014 eftir meiðsli. Hún hefur síðan einbeitt sér að hjólreiðunum.

Sigur hennar á þessum Ólympíuleikum kom nánast öllum á óvart enda var enginn að tala um hana fyrir keppnina.

Fyrir keppnina voru fróðir menn að velta fyrir sér hvort ríkjandi Ólympíumeistari Anna van der Breggen, fyrrum bronshafinn Elisa Longo Borghini, hin breska Lizzie Deignan, hin þýska Lisa Brennauer og fyrrum heimsmeistarinn Annemiek van Vleuten myndu berjast um gullið.

Kiesenhofer var aftur á móti í nokkrum sérflokki á hinni 147 kílómetra braut og kom í mark 75 sekúndum á undan Van Vleuten. Sigur Önnu kom svo mikið á óvart að Van Vleuten hélt að hún hefði unnið gullið þegar hún kom í markið.

Kiesenhofer hefur samt ekki verið hluti af liði undanfarin ár og hefur frekar valið það að æfa ein. „Ég vil vera sjálfstæð og taka mínar eigin ákvarðanir um æfingaáætlun, keppnir og svo framvegis,“ sagði Anna Kiesenhofer sem skipuleggur allt sjálf.

„Sem stærðfræðingur þá er ég vön að leysa öll vandamál sjálf og þannig nálgast ég hjólreiðarnar. Margir hjólreiðamenn hafa fólk sem gerir það fyrir þau. Þau hafa þjálfara, næringarfræðing og einhvern sem skipuleggur keppnirnar. Ég geri þetta allt sjálf,“ sagði Anna en hver er lykillinn að árangri hennar.

„Ég þori að vera öðruvísi. Ég hef aðra nálgun og það þýðir líka að ég er óútreiknanleg sem sást í þessari keppni. Fólk bjóst ekki við því að ég myndi vinna,“ sagði Anna.