Lof og last 12. um­ferðar: Sindri Kristinn, Arn­þór Ingi, Orrarnir tveir í Árbæ og liðum að fatast flugið

Taka skal fram að þetta er eingöngu skoðun blaðamanns og er aðallega gert til skemmtunar.

Lof

Seiglan í Sindri

Sindri Kristinn Ólafsson, markvörður Keflavíkur, lenti í hörku árekstri við samherja sinn strax á 3. mínútu í leik Keflavíkur og KR sem fram fór í Vesturbæ Reykjavíkur. Þó Keflavík hafi tapað leiknum 1-0 þá átti Sindri Kristinn frábæran leik og varði til að mynda vítaspyrnu frá Pálma Rafni Pálmasyni.

Arnþór Ingi Kristinsson

Spilaði loks heilan leik í sigri KR á Keflavík. Hafði spilað 83 mínútur í sigrinum gegn KR í umferðinni á undan og virðist loksins vera að ná upp fyrri styrk. Skoraði sigurmark leiksins með glæsilegu vinstri fótar skoti fyrir utan teig, eitthvað sem ku vera þaulæft. Arnþór Ingi hefur komið við sögu í sjö leikjum hjá KR á tímabilinu, aðeins einn þeirra hefur tapast á meðan KR hefur landað sigri í hinum sex.

Orrarnir tveir í Árbæ

Nafnarnir Orri Sveinn Stefánsson og Orri Hrafn Kjartansson tryggðu Fylki dýrmætan sigur í umferðinni en Árbæingar hefðu verið í blússandi fallbaráttu hefði leikurinn ekki unnist. Miðvörðurinn Orri Sveinn var fljótastur að bregðast við eftir að boltinn small í stönginni en markið hans Orra Hrafns var einkar snoturt. Tvöföld skæri og skot niðri í nær hornið.

Last

Færanýting Blika

Breiðablik mætti á Hlíðarenda og tapaði 3-1 fyrir Vals. Blikar spiluðu frábæran fótbolta en gekk bölvanlega þegar kom að því að setja boltann í netið. Á öðrum degi hefðu lærisveinar Óskars Hrafns Þorvaldssonar unnið þægilegan sigur en allt kom fyrir ekki. Þá myndaðist umræða um að Blikar hafi verið undir í baráttunni.

Víkingur og KA

Bæði lið hófu tímabilið af miklum krafti en nú virðist sem þeim sé að fatast flugið. Víkingur gerði markalaust jafntefli við HK inn í Kór og KA tapaði í Árbæ. Erfitt að tala um að Víkingum sé að fatast flugið þegar liðið er í 2. sæti deildarinnar.

Víkingar hafa þó aðeins unnið 1 af síðustu 4 leikjum sínum og alls 2 af síðustu 7. KA hefur tapað 3 af síðustu 4 og aðeins unnið 1 af síðustu 5 leikjum sínum.

Skaginn

Áttu lítið sem ekkert skilið úr leik sínum við nýliða Leiknis Reykjavíkur. Töpuðu 2-0 en tapið hefði hæglega getað verið stærra. Sitja sem fastast á botni deildarinnar með sex stig eftir 12 leiki. Það sem verra er þá virtist baráttan og andinn úr Skagamönnum, þeir voru undir í allri baráttu. Eitthvað sem er ekki tengt við ÍA.

Lengjudeildin 2022 blasir við.

Pepsi Max deild karla er á Stöð 2 Sport en upplýsingar um útsendingar má finna hér. Pepsi Max deildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.