Sextíu prósent Íslendinga eru fylgjandi afglæpavæðingu neysluskammta

Fréttablaðið fjallar um könnunina í dag og þar segir að um umtalsverða breytingu sé að ræða frá fyrri könnunum en árin 2015, 2017 og 2019 studdi um þriðjungur afglæpavæðingu. 

Í blaðinu er rætt við Helga Gunnlaugsson, prófessor í afbrotafræði, sem telur öruggt að frumvörp Pírata og heilbrigðisráðherra og umræðan í kringum þau hafi haft áhrif á viðhorf landsmanna, en það var Helgi sem lét gera könnunina ásamt Jónasi Orra Jónassyni félagsfræðingi. 

Í blaðinu kemur einnig fram að í fyrri könnunum hafi flestir sagt fíkniefnabrot vera þau sem valdi mestum vanda á Íslandi en í hinni nýju könnun er sá málaflokkur aðeins í þriðja sæti með 23 prósent. 

Flestir, 30 prósent, telja kynferðisbrot alvarlegust og þar á eftir koma efnahagsbrot með 26 prósent, sem mældust lágt fyrir bankahrun.