Heimapartýin um helgina ekki brotleg við samkomubann

Þrátt fyrir háværa umræðu á samfélagsmiðlum um hið gagnstæða segir lögreglan að nýliðin helgi hafi verið hin rólegasta.  Tilkynningar um hávaða í heimahúsum voru þannig ekki fleiri en „gengur og gerist um venjulega helgi“ að sögn setts lögreglustjóra í borginni. Ekkert tilfelli var talið brotlegt við yfirstandandi samkomubann.

Svo virðist sem fólk hafi fagnað góðum árangri í baráttunni við kórónuveiruna með því að lyfta sér upp um helgina, ef marka má færslur á samfélagsmiðlum. Það væri þó ekki í fyrsta sinn, því almannavarnir fengu ábendingar í síðustu viku um að fólk hafi „byrjað að slaka á“ eftir að greint var frá breytingum á samkomubanninu eftir 4. maí.

Sjá einnig: Ekki kominn 4. maí og mögulega hægt að knúsast í júlí

„Við fengum tilfinningu strax í gær að fólki yrði létt,“ sagði Víðir Reynisson, yfirlögreguþjónn, af því tilefni á upplýsingafundi almannavarna á fimmtudag. „Maður skilur vel að fólki hafi verið létt en við verðum að muna að það gilda áfram sömu reglur og hafa gilt og ekki af ástæðalausu.“

Þessi brýning Víðis virðist þó hafa farið framhjá hluta landsmanna, sem birtu myndir af sér við margvíslegan gleðskap um helgina á samfélagsmiðlum. Færslurnar fóru fyrir brjóstið á netverjum sem hvöttu landa sína til að láta af skemmtanahaldinu, baráttan væri ekki búin.

Pistill Sigríðar Karlsdóttur um þetta efni hefur þannig farið víða. Þar skrifar hún til fólks sem orðið er værukært í samkomubanni.

„Sjáiði ekki virðingaleysið? Takið nú rakettuna úr rassinum á ykkur. Takið lika hausinn þaðan út til að þið getið áttað ykkur á heildarmyndinni,“ skrifar Sigríður meðal annars.

Víðir segir í samtali við Bítið að þrátt fyrir að staðan í baráttunni sé góð og að greina megi jákvæð teikn víða hafi „örfáir kannski slakað aðeins of mikið á.“ Þannig hafi lögreglan fengið „of mörg hávaðaútköll um helgina,“ auk þess sem dæmi sé um að „neikvæðu hliðar samfélagsins“ séu að fara í gang aftur eftir að hægt hafði á þeim á síðustu vikum. Því sé mikilvægt að hinn mikli meirihluti sem standi sig vel leiðbeini þeim sem misstígi sig.

Þó svo að borið hafi á skemmtanahaldi um helgina virðist það þó ekki hafa fallið utan settra regla um samkomubann, ef marka má upplýsingar frá Huldu Elsu Björgvinsdóttur, setts lögreglustjóra á höfuðborgarsvæðinu. Þvert á móti hafi verið „nokkuð rólegt í borginni um síðastliðna helgi.“ Þannig hafi lögreglu borist 14 tilkynningar um hávaða í heimahúsum frá klukkan 20 á föstudagskvöld fram til klukkan 20 í gær.

Lögreglan telur að ekki í neinu þessara tilvika hafi hin háværu gerst brotleg við gildandi samkomubann - „og ekki er um að ræða fleiri tilvik en gengur og gerist um venjulega helgi,“ að sögn Huldu Elsu.