Sex greindust innan­­lands í gær og fimm utan sótt­kvíar

Þetta kemur fram í uppfærðum tölum á síðunni covid.is. 28 eru nú á sjúkrahúsi vegna Covid-19 og þar af tveir á gjörgæslu. Í gær voru 29 á sjúkrahúsi og þar af þrír á gjörgæslu.

Ellefu greindust smitaðir á landamærum – fimm virk smit í fyrri landamæraskimun og eitt í seinni landamæraskimun. Þá mældust þrír með mótefni og niðurstöðu mótefnamælingar er beðið í tilvikum tveggja.

139 manns eru nú í einangrun, en fjöldinn var 141 í gær. Þá eru 582 í sóttkví í dag, samanborið við 552 í gær.

Af þeim sex sem greindust í gær greindust fimm eftir svokallaða einkennasýnatöku og einn í sóttkvíar- og handahófsskimun.

Nýgengi innanlandssmita, þ.e. fjöldi smitaðra á hverja 100 þúsund íbúa undanfarnar tvær vikur, er nú 28,6 en var 28,9 í gær. Þá er nýgengi landamærasmita nú 15,8, en var 15,3 í gær.

Alls hafa 5.667 manns greinst með kórónuveiruna hér á landi frá því faraldurinn hófst í lok febrúar. Þá hafa 28 dauðsföll verið rakin til Covid-19 á Íslandi frá upphafi faraldursins.

Alls voru tekin 1.203 einkennasýni hjá sýkla- og veirufræðideild Landspítalans og Íslenskri erfðagreiningu í gær og 985 sýni á landamærunum eða í seinni landamæraskimun. Þá voru fimmtán sýni tekin í sóttkvíar- og handahófsskimun og 273 í annarri skimun hjá Íslenskri erfðagreiningu.

Fréttin hefur verið uppfærð.