Ekkert kemur í veg fyrir Eurovision 2021

Eurovision-keppnin mun fara fram í Rotterdam á næsta ári og mun ekkert koma í veg fyrir það.

Þetta kemur fram í tilkynningu frá forsvarsmönnum Eurovision en allir þátttakendur munu þurfa að taka upp flutning sinn áður en keppnin verður haldin í Hollandi.

Þannig að ef keppendur komast ekki til Rotterdam vegna heimsfaraldursins verður upptakan spiluð á undankvöldinu og síðan á úrslitakvöldinu ef atriðið nær þangað inn.

Fyrra undankvöldið verður 18. maí, seinna 20. maí og úrslitakvöldið verður síðan 22. maí í Rotterdam.

Daði Freyr og Gagnamagnið stíga á sviðið þann 20. maí á seinna undankvöldinu en ekki liggur fyrir hvaða lag fer fyrir Íslands hönd og mun það koma í ljós snemma á næsta ári.