Ljótar lýsingar í nauðgunar­máli á skemmti­stað í Reykja­vík

Karlmaður er sakaður um að hafa á kvennasalerni skemmtistaðar í Reykjavík í febrúar í fyrra nauðgað konu. Lýsingar í ákæru málsins eru grófar og ástæða til að vara lesendur við lýsingum að neðan. Hlaut konan töluverða áverka við árásina eftir því sem fram kemur í ákæru. 

Karlmaðurinn er sakaður um að hafa haft samræði og önnur kynferðismök við konuna án hennar samþykkis. Aðalmeðferð í málinu hófst á mánudag en karlmaðurinn neitar sök.

Í ákærunni segir að karlmaðurinn hafi komið að konunni þar sem hún stóð fyrir framan kvennasalerni staðarins. Kyssti hann hana, leiddi inn á salernið og inn á salernisbás. Þar á hann að hafa lagt hönd hennar á ber kynfæri sín, dregið niður um hana buxurnar og stungið fingum í leggöng hennar.

Sneri hann konunni síðan við og þvingaði eða reyndi að þvinga lim sínum inn í leggöng hennar. Reyndi hann í framhaldinu að láta konuna hafa við sig munnmök en þá komst konan undan.

Á meðan á þessu stóð hafi karlmaðurinn gripið um hár konunnar. Hún hafi ítrekað með orðum og athöfnum reynt að fá karlmanninn til að láta af háttseminni. Hlaut hún hálfs sentímetra sprungu ofan sníps auk roða, sárs og mars á meyjarhafti og tveggja millimetra sprungu á spöng.

Í ákærunni segir að karlmaðurinn hafi beitt konuna og ólögmætri nauðung auk þess að nýta sér yfirburði vegna aðstöðu- og aflsmunar

Farið er fram á fimm milljóna króna miskabætur fyrir hönd konunnar.

Samkvæmt upplýsingum fréttastofu er aðalmeðferð í málinu ekki lokið. Þegar henni lýkur má reikna með um fjórum vikum þar til dómur verður kveðinn upp.

Fréttin hefur verið uppfærð.