Börsungar hófu tímabilið með markaveislu

Barcelona hóf leik í spænsku úrvalsdeildinni í fótbolta í kvöld þegar Villarreal kom í heimsókn á Nývang.

Mikið gekk á í herbúðum Barcelona í sumar en það var ekki að sjá annað en að þeir mæti vel undirbúnir til leiks því Lionel Messi og félagar léku sér að gestum sínum í kvöld.

Staðan í leikhléi var 4-0 fyrir Barcelona eftir tvö mörk ungstirnisins Ansu Fati, eitt mark Lionel Messi og eitt sjálfsmark.

Börsungar slökuðu á klónni í síðari hálfleik þar sem ekkert mark var skorað. Lokatölur 4-0 fyrir Barcelona