Fundu mörg hundruð þúsund myndir af grófu kynferðislegu ofbeldi gegn börnum

Íslenskir karlmenn sem lögregla hefur rannsakað síðustu mánuði höfðu mörg hundruð þúsund myndir og myndbrot af grófu kynferðislegu ofbeldi gegn börnum í fórum sínum. Tvö málanna eru komin til ákæruvaldsins og rannsókn er á lokastigi í tveimur þeirra.

Fram kom í kvöldfréttum Stöðvar 2 í gær að lögreglan hefur lagt hald á gríðarlegt magn barnaníðsefnis hjá karlmönnum sem hafa verið til rannsóknar hjá kynferðisbrotadeild Lögreglunnar á höfuðborgarsvæðinu síðustu mánuði. Tvö málanna hafa verið send til ákæruvaldsins og tvö eru á lokastigi rannsóknar.

Danir gerðu viðamikla á rannsókn dreifingu og vörslu barnaníðsefni seint á síðasta ári og í ljós kom að sjö þeirra mála sem upp komu vörðuðu Íslendinga. Eftir viðamikla rannsókn var niðurstaðan að halda áfram með fjögur málanna.

Samkvæmt heimildum fréttastofu fundust mörg hundruð þúsund myndir og myndbrot af grófu kynferðislegu ofbeldi gegn börnum við rannsókn málanna. Ekkert íslenskt barn var á myndunum sem fundust.

Barnaníðingar framleiða efnið og dreifa. Framleiðsla efnisins fer að stórum hluta eftir eftirspurn en hún verður til um leið og efninu er halað niður þar sem barnaníðingar sækjast sífellt eftir nýju efni.

Ævar Pálmi Pálmason aðstoðaryfirlögregluþjónn kynferðisbrotadeildar Lögreglustjórans á höfuðborgarsvæðinu segir einnig að einhver hluti efnisins sé upprunin frá börnum en þá er um að ræða efni sem börn hafa sjálf sent af sér til vinar en fer svo í dreifingu og lendir í höndum barnaníðinga. Hann segir að slíkum málum hafi fjölgað á borði lögreglunnar.

„Þeim hefur fjölgað og einnig hótanir um að dreifa slíku efni eða þar sem staðið er við hótuninna og myndin send af stað“ segjr Ævar.

Ævar segir mikilvægt að foreldrar séu meðvitaðir um þessa þróun.

„Ég er ekki viss um að foreldrar séu meðvitaðir um þetta. Ég held að maður verði að hvetja forráðamenn barna til að sýna því meiri athygli hvað börnin eru að gera með þessi snjalltæki,“ segir Ævar.