Uppfært 16:56: Samkvæmt tilkynningu frá Veðurstofu Íslands var skjálftinn 4,2 að stærð og varð hann austast í Fagradalsfjalli um 10 kílómetrum norðaustur af Grindavík.
Íbúar á höfuðborgarsvæðinu fundu fyrir vænum hristingi um korter yfir fjögur. Fréttastofu hafa borist símtöl og greinilegt að mjög margir hafa orðið skjálftans varir.
Á vef Veðurstofu Íslands kemur fram að stærð skjálftans, sjálfvirkt mat, hafi verið 4,6 og upptök séu um 2,4 kílómetra suðaustur af Keili.
Einar Bessi Gestsson, náttúruvársérfræðingur á Veðurstofu Íslands, segir að verið sé að fara yfir skjálftann. Hann sé líklega eitthvað um og yfir 4 að stærð.
„Við heyrðum strax frá fólki í Grindavík sem fann náttúrulega fyrir honum. Hlutir í hillum hristust og marraði í veggjum. Þessi er aðeins stærri en sá fyrr í dag,“ segir Einar Bessi.
Virknin er líklega af völdum spennubreytinga vegna endurtekinna kvikuinnskota á Reykjanesskaga sem hófst í lok janúar á þessu ári, að sögn Einars.
Von er á tilkynningu með frekari upplýsingum fljótlega.
Klukkan 13:43 varð annar skjálfti 3,7 að stærð frá Grindavík. Skjálftinn fannst víða á Reykjanesskaga, á höfuðborgarsvæðinu og alveg norður á Akranes.
Mikil skjálftavirkni er á svæðinu eins og sjá má í skjálftatöflu á vef Veðurstofunnar.
Á vef Veðurstofunnar kemur fram að skjálftinn hafi orðið 2,7 kílómetra austur af Fagradalsfjalli eða um tíu kílómetrum norðaustur af Grindavík. Skjálftahrina hefur verið í gangi á svæðinu, en klukkan 7:10 í morgun varð skjálfti 2,8 að stærð á sömu slóðum.
