Kviknaði í skipi í Njarðvíkurhöfn

Eldur kom upp í Langanesi GK525 í Njarðvíkurhöfn í dag. Að sögn Brunavarna Suðurnesja varð vegfarandi var við reyk og hringdi í Neyðarlínuna. Skipið var mannlaust þegar eldurinn kom upp.

Tíu manna lið Brunavarna Suðurnesja fór á vettvang og var þónokkur eldur og mikill hiti í bátnum þegar komið var að. Eldurinn kom upp í stakkageymslu Langaness stjórnborðamegin. Slökkvistarf gekk vel og náðist að ráða niðurlögum eldsins.

Verið er að reykræsta og rannsaka hvort frekari eldglæður leynist um borð í skipinu. Ekki liggur ljóst fyrir hversu miklum skemmdum skipið varð fyrir vegna eldsvoðans en mikill reykur fylgdi eldinum.

Á sama tíma voru liðsmenn Brunavarna í tvígang kallaðir út vegna sjúkraflutninga og var því neyðst til þess að kalla út auka mannafla til að sinna útköllum dagsins.