Einn mögu­leikinn að loka ál­verinu í tvö ár

Rio Tinto skoðar nú þann möguleika að loka álverinu í Straumsvík í tvö ár til að draga úr tapi af rekstri þess.

Þetta herma heimildir Morgunblaðsins, sem greinir frá málinu í dag. Fram kemur í blaðinu að nú sé leitað allra leiða til að stemma stigu við taprekstri Rio Tinto, sem gengið hefur brösulega síðustu ár.

Með lokun álversins séu vonir bundnar við að Rio Tinto geti staðið af sér óhagstæða stöðu á alþjóðlegum álmörkuðum.

Þá herma heimildir Morgunblaðsins einnig að lögfræðingar Rio Tinto undirbúi málaferli gegn Landsvirkjun, með það fyrir augum að losna undan stórum hluta þeirrar kaupskyldu á rafmagni sem fyrirtækið er undir.

Álverið í Straumsvík tapaði tæpum 13 milljörðum í fyrra. Þar áður hafði það verið rekið með tapi í sjö ár.