Rútuslysið undir Eyjafjöllum: Sjúkraflutningamenn tókust á loft í öflugri vindhviðu og slösuðust

Mildi þykir að tveir sjúkraflutningamenn, kona og karl, hafi ekki slasast alvarlega þegar vindhviða hreif þau með sér á vettvangi rútuslyss á Suðurlandsvegi, undir Eyjafjöllum í morgun.

Hermann Marínó Maggýjarson, yfirmaður sjúkraflutninga á Suðurlandi, segir að bæði hafi þurft aðhlynningu læknis eftir byltuna og í ljós hafi komið að annað þeirra hafði fengið vægan heilahristing og blæðingu inn á hné og ökla. Hinn var allur lemstraður og með skurð á fæti.

Myndband af atvikinu má sjá hér að neðan.

Hefði verið erfitt að vinna á vettvangi ef rútan hefði oltið og farþegar hefðu slasast

Viðbragðsaðilar fengu tilkynningu skömmu eftir klukkan átta í morgun um að stór rúta hefði farið út af Suðurlandsvegi, nærri Hafurshól, og endað úti í á. Fjölmennt björgunarlið var sent á vettvang, bæði lögregla og björgunarsveitir auk sjúkraflutningamanna.

Hermann segir að fljótlega hafi komið í ljós að enginn væri slasaður og að til allrar lukku hafi rútan haldist á hjólunum þegar hún fór út af. Um borð hafi verið tuttugu og þrír. Hermann segist ekki geta hugsað þá hugsun til enda ef rútan hefði til dæmis oltið og að viðbragðsaðilar hefðu þurft að sinna mörgum slösuðum í veðurhamnum sem þarna geisaði.

Aðstæður gjörbreyttust eins og hendi væri veifað - Sjúkraflutningamennirnir verða frá vinnu

Á myndbandi sem fréttastofan hefur undir höndum má sjá þegar sjúkraflutningamennirnir standa á veginum. Á þeim tímapunkti er engin hætta á ferðum. Svo, eins og hendi sé veifað, kemur öflug vindhviða og hrífur fólkið með sér. Það berst þónokkurn spöl og lendir á lögreglubíl og vegriði sem er við veginn.

Hermann segir að báðir sjúkraflutningamennirnir muni verða frá vinnu vegna slyssins og ekki ljóst að svo stöddu hvenær þau geta snúið til baka. Hann segir að öryggisbúnaður og öryggisfatnaður sjúkraflutningamannanna hafi átt þátt í því að ekki fór verr. 

Hann segir alla viðbragðsaðila meðvitaða um að hugsa fyrst og fremst um eigið öryggi við vinnu sína. Sjúkraflutningamennirnir voru báðir með hjálma sem skemmdust við höggið þegar fólkið lenti í jörðinni. Hann segir atvikið sýna hversu varhugaverðar aðstæður geti skapast á vettvangi slysa.

Aðvörun um varhugaverðar aðstæður ekki fylgt 

Aðspurður segir Hermann flesta ferðaþjónustuaðila fara eftir því þegar Veðurstofan gefur út veðurviðvaranir. Þegar slysið varð var gul veðurviðvörun í gildi. Hermann segir veðrið hafa verið snarvitlaust og að vindur hafi farið upp í 40 m/s í verstu hviðum.