Fær ekki milljónirnar eftir uppsögn hjá Wow í aðdraganda gjaldþrotsins

Héraðsdómur Reykjavíkur hefur sýknað þrotabú flugfélagsins Wow air af kröfum flugvirkja sem sagt var upp störfum hjá flugfélaginu í desember síðastliðnum, skömmu áður en félagið var tekið til gjaldþrotaskipta eins og frægt er orðið. Flugvirkinn hélt því fram að uppsögn hans hefði verið ólögmæt og m.a. brotið gegn lögum um fæðingarorlof og ráðningarvernd trúnaðarmanna.

Málið var höfðað 27. mars síðastliðinn, daginn áður en Wow air hætti starfsemi eftir mikla rekstrarörðugleika. Starfsmaðurinn krafði þrotabú WOW air um tæpar 14,5 milljónir króna í vangreidd laun og miskabætur, auk málskostnaðar.

Varð fyrir barðinu á niðurskurðarhnífnum í hópuppsögn

Tildrög málsins eru þau að maðurinn starfaði sem flugvirki hjá Wow air frá því í október 2016. Hann var svo skipaður trúnaðarmaður félagsins hjá Wow air í júní 2017. Í september 2018 var honum sagt upp störfum hjá Wow air með samningsbundnum fyrirvara en sú uppsögn var svo dregin til baka eftir að fram komu mótmæli Flugvirkjafélags Íslands til Wow air í október sama ár.

Í lok október tilkynnti maðurinn að hann hygðist hefja töku fæðingarorlofs en um miðjan nóvember tilkynnti hann um að hann vildi fresta töku fæðingarorlofsins um óákveðinn tíma. Þann 13. desember 2018 var honum svo loks tilkynnt að hann væri meðal þeirra sem sagt hefði verið upp störfum hjá Wow air í hópuppsögn.

 

Framganga Wow air íþyngjandi og bakað honum andlegt tjón

Maðurinn krafðist bóta frá Wow air á grundvelli þess að uppsögn hans hefði verið ólögmæt þar sem hann hafi notið ráðningarverndar sem trúnaðarmaður stéttarfélags síns. Þá byggði hann kröfu sína einnig á því að bannað væri að segja upp starfsmanni sökum þess að hann hafi tilkynnt um fyrirhugað fæðingarorlof.

Þá byggði maðurinn á því að röksemdir Wow er vörðuðu rekstrarerfiðleika fyrirtækisins, sem á tímabili uppsagnarinnar voru orðnir talsverðir, gætu ekki talist gildar ástæður fyrir uppsögninni, m.a. þar sem ekki hafi öllum flugvirkjum verið sagt upp. Auk þess hafi hann haft meiri starfsreynslu en a.m.k. tveir af þeim sem ekki var sagt upp.

„Hann vísar til þess að framganga og framkoma Wow air hf. hvað varðar fyrri uppsögn, áminningu og endanlega uppsögn hafi verið sérlega íþyngjandi fyrir hann og bakað honum andlegt tjón, rýrt  starfsheiður hans og haft neikvæð áhrif á álit annarra á honum. Þá hafi framganga Wow air hf. varðandi veitingu starfsréttinda og þjálfun til þeirra verið meiðandi í hans garð og valdið tjóni,“ segir m.a. í dómnum.

 

Ljóst að reksturinn gekk „afar brösulega“

Wow air vísaði m.a. til þess að uppsögn mannsins hefði verið liður í veigamiklum ráðstöfunum sem fyrirtækið „hafi verið nauðbeygt til að gera í ljósi fjárhagsstöðu sinnar.“ Uppsögnin hafi á engan hátt tengst persónu mannsins eða fyrri atvikum í samskiptum hans og Wow air. Þá hafi maðurinn jafnframt ekki haft svokölluð „týpuréttindi“ á flugvélar Wow air.

Í dómi segir að svo virðist sem „býsna óljóst“ hafi verið hverjir voru trúnaðarmenn Flugvirkjafélags Íslands hjá Wow air. Það sé óheppilegt og slík óvissa verði að telja atvinnurekanda, þ.e. Wow air, í óhag. Einnig verði að taka undir það með manninum að réttarvernd um fæðingarorlof hafi ekki fallið niður við það að hann frestaði töku þess, líkt og Wow air hélt fram.

Hins vegar sé óumdeilt að rekstur Wow air gekk „afar brösulega“ í lok árs 2018 þegar atvik málsins urðu. Í þessu ljósi verða uppsagnir flugfélagsins að teljast eðlilegar.

Niðurstaða dómsins var því að endingu sú að uppsögnin hafi farið fram á málefnalegum forsendum. Þá hafi uppsögn flugvirkjans hvorki farið gegn ákvæðum um ráðningarvernd trúnaðarmanna né brotið gegn ákvæði laga um fæðingarorlof. Wow air var því sýknað af kröfum mannsins en málskotnaður var látinn falla niður.