Skutu eldflaug úr kafbáti

Norður-Kórea skaut eldflaug á nótt sem talið er að hafi verið skotið úr kafbáti. Þetta er í fyrsta sinn í þrjú ár sem einræðisríkið gerir tilraunir með slíkar eldflaugar og að þessu sinni var það gert nokkrum dögum áður en viðræður við Bandaríkin um kjarnorkuvopna- og eldflaugaáætlun ríkisins hefjast að nýju. Eldflaugin mun hafa lent innan lögsögu Japan og kvörtuðu embættismenn þar í landi til Norður-Kóreu.

Þetta er í níunda sinn sem eldflaug er skotið á loft frá Norður-Kóreu frá júlí.

Samkvæmt Yonhap, fréttaveitu frá Suður-Kóreu, er talið að eldflaugin hafi verið af gerðinni Pukguksong en þær geta borið kjarnorkuvopn. Hún lenti í um 450 kílómetra fjarlægð frá skotstaðnum en náði um 910 kílómetra hæða. Hefði eldflauginni verið skotið með hefðbundnum hætti gæti hún drifið mun lengra en 450 kílómetra.



Varnarmálaráðuneyti Suður-Kóreu segir eldflaugarnar geta drifið um 1.300 kílómetra.

Erfiðara er að greina eldflaugaskot frá kafbátum og með þeim er einnig hægt að draga verulega úr viðbragðstíma þeirra sem verið er að skjóta á.

Sérfræðingar sem AP fréttaveitan ræddi við segja mögulegt að forsvarsmenn einræðisríkisins vilji með þessu setja aukinn þrýsting á Bandaríkin fyrir áðurnefndar viðræður.



Kóreumenn hafa unnið að því að þróa eldflaugar sem þessar og í sumar birti KCNA, ríkismiðill Norður-Kóreu, myndir af nýjum kafbáti sem átti að taka í notkun á næstunni. Sá kafbátur er talinn sá stærsti sem Norður-Kórea býr yfir og sá eini sem hægt er að nota til að skjóta langdrægum eldflaugum.

Norður-Kórea býr yfir um 70 öðrum kafbátum en talið er að þeir búi ekki yfir þeim búnaði sem til þarf til að skjóta eldflaugum á loft úr kafi.