Gular viðvaranir og haustið í algleymingi

Í dag gengur í suðaustanstorm, og jafnvel -rok, sunnan- og vestantil og rignir dálítið. Vindur verður mun hægari á Norður- og Austurlandi og yfirleitt bjart, að því er fram kemur í hugleiðingum veðurfræðings á vef Veðurstofu Íslands. Þá taka gular viðvaranir víða gildi í dag.

Ekki fer að draga úr vindi fyrr en snemma á laugardag en þá hvessir fyrir norðan og austan. Rignir víða í nótt og fram á morgun en rofar svo smám saman til. Þó heldur áfram að rigna talsvert á Suðausturlandi allan morgundaginn fram á sunnudag. Áfram fremur hlýtt á öllu landinu um helgina.

„Greinilegt er að haustið er í algleymingi og því vissara að aka gætilega í byljóttum vindi, festa tryggilega lausamuni við húsið og hreinsa laufblöð og annað rusl frá niðurföllum og ræsum,“ segir í hugleiðingum veðurfræðings.

Gular viðvaranir taka gildi á Suðurlandi, Miðhálendinu og Faxaflóa í dag. Á þeim svæðum má búast við stormi og jafnvel roki, allt að 25-28 m/s, og mjög snörpum vindhviðum við fjöll, staðbundið yfir 35 m/s, einkum undir Eyjafjöllum, á Kjalarnesi og við Hafnarfjall.

Veðurhorfur á landinu

Gengur í suðaustan 15-25 m/s upp úr hádegi, hvassast SV til. Skýjað að mestu og dálítil rigning S og V til. Suðaustan 13-23 og víða rigning í fyrramálið, hvassast syðst, en þurrt fyrir norðan. Dregur síðan úr vindi og úrkomu, en rignir áfram talsvert SA til. Hiti 5 til 13 stig, hlýjast SV-lands.

 

Veðurhorfur á landinu næstu daga

Á laugardag:

Suðaustan 13-23 m/s, hvassast syðst og rigning á S-verðu landinu, jafnvel mikil úrkoma á SA-landi, en þurrt að kalla fyrir norðan. Dregur heldur úr vindi er líður á daginn. Hiti 8 til 15 stig, hlýjast á N-landi.

Á sunnudag:

Suðlæg átt, strekkingur og rigning austast, en annars hægari, bjart með köflum og hiti 6 til 12 stig.

Á mánudag og þriðjudag:

Allhvöss eða hvöss austlæg átt með talsverðri rigningu A-til, en úrkomulítið V-lands og áfram milt í veðri.

Á miðvikudag og fimmtudag:

Útlit fyrir norðaustanátt með rigningu N-lands, en víða bjartviðri fyrir sunnan og kólnar lítillega.