Tengdafaðirinn gefur lítið fyrir orðróm um brotthvarf Bjarna

Baldvin Jónsson blæs á sögusagnir þess efnis að tengdasonur hans, Bjarni Benediktsson, muni segja skilið við stjórnmálin í haust. Þrálátur orðrómur þess efnis hefur sett svip á umræðurnar um ólguna innan Sjálfstæðisflokksins, sem Bjarni veitir forystu, en hart er sótt að forkólfum flokksins vegna framgöngu þeirra í málefnum Þriðja orkupakkans.

Fullyrt hefur verið í eyru blaðamanns Vísis, úr röðum óánægðra flokksmanna, að í haust muni Bjarni stíga úr formannsstóli og Þórdís Kolbrún Reykfjörð Gylfadóttir, varaformaður flokksins, taka við sem formaður fram að Landsfundi sem haldinn verður að ári. Þá verði nýr formaður kosinn.

Sambærilegar fullyrðingar hafa birst í nafnlausum skrifum á vefmiðlum, jafnt á vef Hringbrautar (þrisvar á síðastliðnu ári) og Eyjunnar. Þá blés Útvarp Saga til skoðanakönnunnar á dögunum þar sem einfaldlega var spurt: Telur þú að Bjarni Benediktsson fjármálaráðherra sé að hætta í stjórnmálum?

Niðurstöðurnar voru afgerandi. Rúm 71 prósent aðspurðra telja að Bjarni segið skilið við pólitíkina í náinni framtíð. Forspárgildi kannanna Útvarps Sögu þykir þó ekki merkilegt.

Neitun ekki stöðvað Gróu

Tengdaföður Bjarna, Baldvini Jónssyni, þykir lítið til þessara nafnlausu skrifa og kannana koma. Þessar fabúleringar séu byggðar á dylgjum - „sem ill mögulegt er að stöðva enda svo mikið bull á ferðinni.“ Þetta sé til þess fallið að ala á „tortryggni í garð viðkomandi,“ sem Baldvin nefnir þó ekki á nafn.

Bjarni hefur sjálfur þvertekið fyrir þessar vangaveltur. Það gerði hann til að mynda í samtali við fréttamann Stöðvar 2 sem bar orðróminn undir hann á 90 ára afmæli Sjálfstæðisflokksins í lok maí. Bjarni sagði af og frá að hann myndi hætta í haust, kjörtímabilið væri varla hálfnað og ríkisstjórnin ætti enn eftir að fylgja mikilvægum málum úr hlaði.

Andinn í stjórnarliðinu virðist þannig vera ágætur, ef marka má ummæli Katrínar Jakobsdóttur forsætisráðherra í þessu sama afmæli. Bjarni væri einn besti samstarfsmaður sem hún hafi haft.

Þessi neitun virðist þó lítið hafa gert til að slá á orðrómana ef marka má skrif Baldvins.

„[S]amt heldur fólk áfram með sora, dylgjur og ómerkilegheit. Er ekki í lagi með okkur þessa annars ágætu [þ]jóð? Eða er hún það ekki svona upp til hópa?“ spyr Baldvin á Facebook-síðu sinni við hrifningu áhrifamanna úr Sjálfstæðisflokknum; Sturla Böðvarsson, Jón Gunnarsson, Vilhjálmur Egilsson, Sigríður Á. Andersen og Þórdís Kolbrún Reykfjörð Gylfadóttir eru meðal þeirra sem lýsa velþóknun sinni á færslunni sem sjá má hér að neðan.