Sex mánaða fangelsisdómur yfir rútubílstjóra í banaslysi

Rútubílstjóri sem ók rútu sem ekið var aftan á fólksbíl og valt út af Suðurlandsvegi vestur af Kirkjubæjarklaustri í desember 2017 hefur verið dæmdur í sex mánaða skilorðsbundið fangelsi. Héraðsdómur Suðurlands kvað upp dóm sinn í gær.

Fjörutíu og fjórir kínverskir ferðamenn voru um borð í rútunni. Tveir ferðamenn létust og fjölmargir voru fluttir slasaðir af vettvangi þar af tólf með þyrlu Landhelgisgæslunnar. Meðal hinna slösuðu var bílstjórinn sem hlaut dóm í gær.

Ökumaður fólksbílsins, ferðamaður frá Litháen, var að beygja inn á útsýnisstað vestan við Hunkubakka þegar rútan lenti aftan á bifreiðinni og síðan norður fyrir veg og valt þar á hliðina. Hann slasaðist ekki alvarlega.

Ökutækið átti ekki að vera í umferð

Rútubílstjórinn var sviptur ökuréttindum í tvö ár frá dómsuppsögu. Þá þarf hann að greiða á þriðju milljón króna í sakarkostnað.



Bíltæknirannsókn á hópferðabifreiðinni leiddi í ljós að hemlageta hennar hafi verið verulega ábótavant. Aðeins eitt hjól var fullneglt og örfáir naglar í hinum. Þrátt fyrir það var hálkan á veginum það mikil að óvæst er að full hemlageta bifreiðarinnar og fullnegldir hjólbarðar hefðu getað komið í veg fyrir óhappið.

Bifreiðin hafi í raun ekki átt að vera í umferð vegna skorts á viðhaldi. Ökumaðurinn kvaðst fyrir atvikið hafa tekið eftir að helmarnir hafi tekið misjafnt í hjólin.

 

Ók á um 100 km/klst rétt fyrir slysið

Samkvæmt ökurita bifreiðarinnar ók ökumaðurinn á 100-102 km/klst rétt fyrir slysið. Klukkan 10:05 mældist hraðinn 101 km/klst en stuttu síðar dró ökumaðurinn skyndilega og snögglega úr hraðanum.

Ökumaðurinn kvaðst sjálfur hafa fært sig yfir á miðjan vegarhelming vegna bifreiðar, hverrar ökumaður ók löturhægt. Þegar ákærði hafi nálgast bifreiðina segir hann að tvær stúlkur hafi gengið þvert yfir veginn og hann í framhaldinu fært sig yfir á hægri vegarhelming.

Þegar ökumaðurinn hafi sveigt aftur yfir á hinn vegarhelminginn hafi áðurnefnd bifreið verið komin nánast út fyrir veg og henni allt í einu ekið í veg fyrir ákærða án þess að gefa stefnuljós.

Ökumaður segist þá hafa keyrt þversum og eftir það muni hann ekki meir.

Þegar ástand bifreiðarinnar er virt, hraði hennar rétt fyrir slysið og ástand vegarins telja dómarar nægilega sannað að ákærði hafi með háttsemi sinni orðið valdur að dauða tveggja farþega í bifreiðinni og alvarlegum meiðslum tveggja annarra farþega.

Fréttin var uppfærð með frekari upplýsingum kl. 15.00