Formaður fjárlaganefndar segir gagnrýni á fjármálaáætlun rakalausa

Formaður fjárlaganefndar segir orð þingmanns Samfylkingarinnar um niðurskurð og breytingar á fjármálaáætlun rakalausan. Hann segir engan koma til með að finna fyrir breytingum á áður boðaðri aukningu til málefnasviða ríkisins á næsta ári.

Ágúst Ólafur Ágústsson, þingmaður Samfylkingarinnar birti í fyrradag færslu á samfélagsmiðlum, eftir fundfjárlaganefndar, breytingartillögur fjármálaráðherra á fjármálaáætlun, sem gerðar eru í ljósi breyttra aðstæðna í hagkerfinu. Þar sagði hann margt koma á óvart um breytingar á útgjöldum til málefnasviða ríkisins frá því sem boðað var í fjármálaáætluninni í mars síðast liðnum.

Í breytingartillögunum kemur fram að framlög til öryrkja næstu fimm árin eiga að lækka samanlagt um tæpa átta milljarða. Útgjöld til umhverfismála verði lækkuð um 1,4 milljarða á sama tímabili, framhaldsskólar fá lækkun um 1,8 milljarð og sjúkrahúsþjónusta fær um 4,7 milljarða króna lækkun. Þá verða fjárframlög til löggæslu lækkuð um einn milljarð og samgöngumál um 2,8 milljarða frá því sem fyrri áætlun gerði ráð fyrir, og sé litið til heildarútgjalda til samgöngumála lækki þau um 17% næstu fimm árin.

Willum Þór Þórsson, þingmaður Framsóknarflokksins og formaður fjárlaganefndar var gestur Kristján Kristjánssonar á Sprengisandi á Bylgjunni í morgun þar sem hann sagði málflutning Ágúst Ólafs ábyrgðarlausan.

„Að tala um niðurskurð er rakalaus málflutningur og ég segi bara orðum fylgir ábyrgð. Ég skal alveg reyna að umbera það að menn séu í pólitík en að gefa þessi skilaboð út í samfélagið  er bara býsna alvarlegt mál vegna þess að það er enginn niðurskurður,“

„Það er enginn í samfélaginu að fara finna fyrir neinum niðurskurði. Þvert á móti í grunnþjónustu eða innviða uppbyggingu inn á árið 2020 sem er grunnurinn að fjárlagavinnunni sem fer fram í haust. það er aukning til allra málefnasviða og og það breytist ekki neitt,“ sagði Willum.

Stór pólítísk sprengja inn á þing

Ágúst Ólafur var einnig gestur Kristjáns Kristjánssonar á Sprengisandi og sagði hann Willum ekki geta hrakið neitt af því sem hann hefur lagt fram.

„Átta milljarða króna högg á öryrkja, frá því sem var fyrihugað af hálfu ríkisstjórnarinnar fyrir tveimur mánuðum, það er stór pólitísk sprengja sem þið eruð að varpa inn á þingi á loka metrum þingins,“ sagði Ágúst Ólafur en Willum segir svo ekki vera og segir aukningu verða en hún verði hægari en áður var ákveðið.

Kristján spurði Willum að lokum hvort boðskapur hans væri að það myndi enginn finna fyrir breytingum árið 2020, að öll fyrirheit um aukningu muni halda?

„Já það er það sem tölurnar segja okkur,“ sagði Willum Þór Þórsson, þingmaður Framsóknarflokksins og formaður Fjárlaganefndar.