Í­búa­fundur í Vestur­bænum: Lög­reglu­stjóri býst við því að sam­þykkja lækkun um­ferðar­hraða á Hring­braut

Sigríður Björk Guðjónsdóttir, lögreglustjóri á höfuðborgarsvæðinu, býst fastlega við því að hún muni taka jákvætt í það að lækka umferðarhraða á Hringbraut. Borgarstjórn hefur samþykkt að lækka umferðarhraða á Hringbraut, á milli Sæmundargötu og Ánanausta, niður í fjörutíu kílómetra hraða á klukkustund.

Það er þó háð samþykki lögreglustjórans sem var mættur á íbúafund í Vesturbæjarskóla í kvöld um bætt öryggi á Hringbraut. Boðað var til íbúafundarins eftir að ekið hafði verið á stúlku á Hringbraut sem var á leið til skóla í janúar síðastliðnum.

Íbúar Vesturbæjar kölluðu umsvifalaust eftir aðgerðum frá yfirvöldum og var kallað til íbúafundar þar sem fulltrúar lögreglunnar, borgarinnar, Vegagerðarinnar, Samgöngustofu og samgönguráðuneytinu sátu fyrir svörum.

Sigríður Björk sagði á fundinum að málið sé henni kært því hún búi sjálf í hverfinu þar sem börnin hennar stunda nám og tómstundir. Sjálf starfi hún í miðbænum og reynir að fara til og frá vinnu fótgangandi og hjólandi en stöku sinnum á bíl.

Þjónar einnig íbúum á Seltjarnarnesi

Sigríður Björk sagði að vissulega gæti það gert gagn að lækka umferðarhraða en hún sagði margt annað þurfa að koma til. Hún nefndi að gríðarlegt umferðarmagn sé á þessari götu því hún þjónar ekki bara Vesturbæjarbúum heldur einnig íbúum Seltjarnarness.

Sigríður nefndi einnig að Hringbrautin væri einnig mikilvæg öryggismálum í þessum hluta borgarinnar ef að grípa þyrfti til rýmingaráætlunar og koma þyrfti fólki fljótt af svæðinu, líkt og kom til greina um daginn vegna bruna.

Sagði Sigríður að ekki væri nóg að lækka hámarkshraða á Hringbraut til að tryggja öryggi gangandi vegfarenda. Bæta yrði lýsingu og umferðarljósastýringu og bætti við að ef vegur er greiðfær þá auki það líkur á hraðakstri.

Á fundinum kom fram að bæta ætti gangbrautaljósastýringu og skipta ætti út öllum gangbrautaljósum á Hringbraut fyrir árið 2020. Þá eru hugmyndir um að fjölga umferðareftirlitsmyndavélum á svæðinu en það þarf að tryggja fjármagn fyrir þeim og fyrir úrvinnslu á gögnum úr þeim.

240 mál skráð

Sigríður Björk sagði að kjarnaverkefni lögreglunnar vegna löggæslu í umferð snúa að akstri undir áhrifum. Með sama hætti fylgist lögreglna með aðkomu að skólum en frá því umferðareftirlit hófst við setningu skóla síðastliðið haust þá hafa 240 mál verið skráð.

Sigríður taldi hverfandi líkur á að embætti lögreglustjóra myndi ekki samþykkja tillögur borgarinnar um lækkun umferðarhraða en benti á að samt sem áður þurfti að koma umferð um Hringbraut. Hún sagði að það væri ekki gríðarlegur hraðakstur á Hringbraut miða við mælingar lögreglu.

Fjórar hraðamælingar

Ásgeir Þór Ásgeirsson, yfirlögregluþjónn umferðardeildar höfuðborgarsvæðisins, sagði á fundinum að gerðar hefðu verið fjórar hraðamælingar á Hringbraut í janúar síðastliðnum. Ásgeir sagði að meðalhraðinn í þessum mælingum hafi verið minnstur 41 kílómetri á klukkustund og mestur 44 kílómetrar á klukkustund en hraðamælingarnar voru framkvæmdar þegar skilyrði voru sem mest fyrir hraðari umferð, það er að segja þegar umferð var nokkuð létt.

Sigríður sagði að þetta væri ekki gríðarlegur hraðakstur nema í undantekningartilvikum.

Hún lauk máli sínu á að benda á að öryggi barna á Hringbraut verði ekki tryggt nema að þverunum á Hringbraut með undirgöngum og brúm, en það sé mögulega ekki gerlegt að svo stöddu. Því sé brýnt að auka lýsingu á Hringbrautinni, fjölga myndavélum og gera allt sem er hægt til að auka öryggi á þessum vegi.