Maður hékk á göngubrúnni yfir Miklubraut

Sérsveit lögreglu og slökkvilið var kölluð út að göngubrúnni yfir Miklubraut við Kringluna á fjórða tímanum í dag þar sem tilkynnt hafði verið um karlmann hangandi á göngubrúnni. Maðurinn hótaði því að stökkva af brúnni.

Fjölmargir vegfarendur á öllum aldri, þar á meðal börn, fylgdust með aðgerðum á vettvangi. Sérsveitarmenn náðu manninum af brúnni en hann hreyfði við miklum mótmælum þegar þeir náðu til hans og tóku yfir grindverkið á brúnni.

Umferð var stöðvuð um Miklubraut á meðan aðgerð stóð.

Nánar verður fjallað um málið í kvöldfréttum Stöðvar 2.

Fólk með sjálfsvígshugsanir er minnt á Hjálparsíma Rauða krossins, 1717, og netspjallið. Þjálfaðir og reynslumiklir sjálfboðaliðar á öllum aldri svara þeim símtölum og spjöllum sem berast. Fullum trúnaði er heitið.

Nánari upplýsingar hér.

Tilkynning frá lögreglu vegna málsins

Á fjórða tímanum í dag barst lögreglu tilkynning um vegfaranda í ójafnvægi á göngubrú á Miklubraut, á móts við Kringluna, en óttast var að viðkomandi kynni að fara sér að voða.

Brugðist var fljótt við og tókst að afstýra því að illa færi, en vegfarandum var síðan komið í hendur viðeiganda aðila. Eilítil röskun varð á umferð vegna þessa, en loka varð fyrir umferð í stutta stund á meðan aðgerðum á vettvangi stóð.

Uppfært klukkan 16:44 með tilkynningu lögreglu.