Sport

Janúarfótbolti í Chicago í fyrsta sinn í átta ár

Óskar Ófeigur Jónsson skrifar
Khalil Mack hjá Chicago Bears fagnar sigri með stuðningsmönnum.
Khalil Mack hjá Chicago Bears fagnar sigri með stuðningsmönnum. Vísir/Getty
Chicago Bears liðið tryggði sér sæti í úrslitakeppni NFL-deildarinnar í gær en Kúrekarnir frá Dallas klúðruðu aftur á móti sínu tækifæri og skoruðu ekki eitt einasta stig ekki frekar en Risarnir frá New York. Dallas eins og New England Patriots mistókst að tryggja sig inn í úrslitakeppnina en fá bæði annað tækifæri í næstu viku.





Chicago Bears vann ekki aðeins langþráðan heimasigur á nágrönnum sínum í Green Bay Packers heldur tryggði sér einnig sæti í úrslitakeppninni í fyrsta sinn frá árinu 2010. Green Bay hafði unnið 9 af síðustu 10 leikjum liðanna en Aaron Rodgers og félagar komust lítið áleiðis gegn hinni sterku vörn Chicago Bears og missa því af úrslitakeppninni annað árið í röð.

Þjálfarinn Matt Nagy hefur gjörtbreytt Chicago Bears liðinu síðan að hann tók við en þetta var sjöundi sigur liðsins í síðustu átta leikjum. Með því að vinna 24-17 sigur á Packers þá hefur liðið tryggt sér sigur í Norðurriðli Þjóðardeildarinnar. Það var mikil gleði í Chicago enda verður núna janúarfótbolti hjá félaginu í fyrsta sinn síðan 2010.





Dallas Cowboys átti líka möguleika á því að tryggja sig inn í úrslitakeppnina með sigri á Indianapolis Colts en Kúrekarnir höfðu unnið fimm leiki í röð. Cowboys-liðið gekk hinsvegar á vegg og náði ekki að skora eitt einasta stig í 23-0 tapi. Þetta er í fyrsta sinn í fimmtán ár sem Kúrekarnir fara stigalausir í gegnum heilan leik.

New York Giants varð sér til enn meiri skammar með því að skora ekki eitt einasta stig á heimavelli á móti Tennessee Titans. Titans liðið á enn möguleika á sæti í úrslitakeppninni og sýndi styrk sinn með 17-0 sigri á Risunm sem hafa verið afar rislitlir á þessari leiktíð.





New England Patriots er líka lið sem mistókst að tryggja sig inn í úrslitakeppnina. New England Patriots tapaði öðrum leiknum í röð nú fyrir erkifjendum sínum í Pittsburgh Steelers. Steelers unnu leikinn 17-10 og enduðu þriggja leikja taphrinu sína með mikilvægum sigri.

Seattle Seahawks er enn eitt liðið sem mistókst að tryggja sig inn í úrslitakeppnina í gær en Seahawks liðið tapaði þá á móti San Francisco 49ers sem er fyrir löngu úr leik.







Meistararnir í Philadelphia Eagles eiga enn möguleika á úrslitakeppni þrátt fyrir skrautlegt tímabil en þeir héldu sér á lífi með 30-23 sigri á hinu sterka liði Los Angeles Rams í nótt. Leikstjórnandinn Carson Wentz er meiddur og alveg eins og á meistaraárinu í fyrra þá tók Nick Foles við keflinu og leiddi Eagles liðið til sigurs.

Þetta var í fyrsta sinn sem Los Angeles Rams tapar tveimur leikjum í röð undir stjórn Sean McVay en Hrútarnir hafa misst aðeins einbeitinguna eftir að þeir tryggðu sér sæti í úrslitakeppninni.

Það er nú aftur komin spenna í Austurriðil Þjóðardeildarinnar eftir tap Dallas Cowboys (8 sigrar - 6 töp) og sigra hjá bæði Philadelphia Eagles (7 sigrar - 7 töp) og Washington Redskins (7 sigrar - 7 töp).

Úrslitin í öllum leikjum í NFL-deildinni:

Los Angeles Rams - Philadelphia Eagles 23-30

New York Jets - Houston Texans 22-29

Denver Broncos - Cleveland Browns 16-17

Atlanta Falcons - Arizona Cardinals 40-14

Baltimore Ravens - Tampa Bay Buccaneers 20-12

Buffalo Bills - Detroit Lions 14-13

Chicago Bears - Green Bay Packers 24-17

Cincinnati Bengals - Oakland Raiders 30-16

Indianapolis Colts - Dallas Cowboys 23-0

Jacksonville Jaguars - Washington Redskins 13-16

Minnesota Vikings - Miami Dolphins 41-17

New York Giants - Tennessee Titans 0-17

San Francisco 49ers - Seattle Seahawks 26-23

Pittsburgh Steelers - New England Patriots 17-10

NFL

Mest lesið


Fleiri fréttir

Sjá meira


×

Mest lesið