Stækkaði typpi skíðastökkvara

Það var þýski miðillinn Bild sem greindi fyrst frá því að það þekktist í skíðastökksheiminum að menn létu sprauta hýalúronsýru í reður sinn og stækka hann þannig tímabundið, með það í huga að mega þá klæðast örlítið stærri keppnisbúningi.

Strangar reglur gilda nefnilega um hve þröngir búningarnir eiga að vera en hver fermillímetri getur hjálpað mönnum að svífa örlítið lengra og þannig jafnvel skilið á milli gulls og silfurs.

Nú hefur lýtalæknirinn Alessandro Littara staðfest að hið minnsta einn skíðastökkvari hafi látið stækka á sér typpið. Sá notaði þó aðra ástæðu fyrir því en þá að vilja ná árangri í sinni íþróttagrein en var ekki endilega að segja satt, eins og Littara bendir sjálfur á.

„Varðandi þessar fréttir sem hafa verið til umræðu þá meðhöndlaði ég vissulega íþróttamann úr þessari íþróttagrein. En ég mun auðvitað ekki gefa upp nafn hans eða þjóðerni, né segja til um hvort hann er þátttakandi á þessum Ólympíuleikum,“ sagði Littara við USA Today.

„Ég get hins vegar staðfest að ég meðhöndlaði hann í síðasta mánuði og notaði ríflegan skammt af hýalúronsýru,“ sagði Littara sem kveðst hafa stækkað typpi tímabundið með þessum hætti meira en 3.000 sinnum.

Áður hafði alþjóða skíðasambandið lýst fréttunum sem „klikkuðum orðrómi“ en alþjóða lyfjaeftirlitið ætlaði að kanna málið og sjá hvort að um mögulegt brot á lyfjareglum væri að ræða.

Littara segir skíðastökkvarann sem leitaði til hans hafa viljað stækka typpið því honum þætti vandræðalegt að afklæðast í búningsklefanum eftir keppni.

„Ég get ekki sagt til um það hvort hann var að segja alveg satt. En okkur tókst alla vega vel til og komum fyrir mjög veglegum skammti af hýalúronsýru. Áhrifin koma strax, svo íþróttamaðurinn gat klætt sig í nýjan búning örfáum mínútum síðar,“ sagði Littara.