Jöklar Íslands rýrnuðu ekki í fyrsta sinn í aldarfjórðung

Stærstu jöklar landsins stóðu í stað og jafnvel stækkuðu á síðustu tólf mánuðum, frá hausti til haust, samkvæmt nýjustu mælingum. Þetta er í fyrsta sinn í aldarfjórðung sem íslensku jöklarnir rýrna ekki. Jöklasérfræðingur telur þetta eðlilegt frávik frá hnattrænni hlýnun sem geti skýrst af kaldari sjó sunnan við landið. Þetta kom fram í fréttum Stöðvar 2. 

Afkoma íslensku jöklanna þykir sterk vísbending um þróun loftslags hérlendis. Jöklarannsóknamenn Jarðvísindastofnunar Háskóla Íslands fóru í október í árlega mælingaleiðangra um Vatnajökul og Langjökul og nú liggja niðurstöður fyrir um þessar tvær stærstu jökulbreiður landsins.

 

„Þær standa nokkurn veginn í stað þetta árið, sem er óvanalegt miðað við síðustu 25 ár. Þær hafa verið að rýrna, bæði Vatnajökull og Langjökull, sérstaklega þó Langjökull,“ segir Finnur Pálsson, verkefnastjóri jöklarannsókna við Jarðfræðistofnun Háskóla Íslands. 

Þannig hafði Langjökull þynnst að jafnaði um einn og hálfan metra á ári undanfarin tuttugu ár, að sögn Finns. 

„En síðustu nokkur árin hefur hann verið nærri núlli, það er að segja, hann hefur hvorki stækkað né minnkað. Og það á við um þetta ár, bæði fyrir Vatnajökul og Langjökul.“ 

Árleg mæling á Hofsjökli, sem sérfræðingar Veðurstofu Íslands kynntu fyrir tíu dögum, sýnir að hann hefur örlítið bætt á sig milli ára, og takmörkuð mæling á yfirborði Mýrdalsjökuls sýnir að hann stækkaði einnig. Þar varð raunar veruleg viðbót.

Finnur segir þessar tölur ekkert tilefni til að efast um hnattræna hlýnun, þetta teljist eðlileg frávik. 

„Ein orsökin gæti verið að það er heldur kaldari sjór sunnan við land,“ segir Finnur. 

Spurningu um hvort þetta sé vísbending um að Ísland sé að sigla inn í kuldaskeið vísar hann á veðurfræðinga.

„Hins vegar er það staðreynd að það hefur verið heldur kaldara síðustu nokkur árin. Sumarið í sumar var mjög óvanalegt, kannski ekki endilega vegna kulda heldur vegna þess að það var svo þungbúið meirihluta sumarsins, sérstaklega hérna á öllu vestanverðu landinu.“

Athyglisvert er að hlýtt sumar austanlands kom greinilega fram á Vatnajökli. Þannig mældist rýrnun austanmegin á Vatnajökli en viðbót vestanmegin. 

Og kalt sumar vestanlands sást á Langjökli. 

„Ég held að það hafi verið snjósöfnun meira og minna fram í ágúst á efri hluta Langjökuls, sem er mjög óvenjulegt,“ segir verkefnastjóri jöklarannsókna Háskólans. 

Hér má sjá frétt Stöðvar 2: