Venus nær sátt vegna bílslyss þar sem maður lést

Tennisstjarnan Venus Williams hefur náð samkomulagi við fjölskyldu manns sem lést í bílslysi er keyrt var á bíl Williams.

Bílslysið varð sumarið 2017. Venus var þá að keyra yfir gatnamót á grænu ljósi en komst lítt áfram þar sem það var mikil umferð á gatnamótunum.

Svo kemur grænt ljós hinum megin á meðan hún er enn á gatnamótunum. Þá keyrir annar bíll inn í hlið hennar bíls. Farþegi í bílnum, hinn 78 ára gamli Jerome Barson, lést af sárum sínum tveimur vikum síðar en eiginkona hans keyrði bílinn.

Lögreglan sá aldrei ástæðu til þess að aðhafast vegna Williams eða eiginkonu Barson en það ku hafa verið innkoma annars bíls sem var aðalástæðan fyrir slysinu.

Fjölskylda Barson fór engu að síður í einkamál við Williams og nú hefur náðst sátt í því máli. Engar upplýsingar hafa verið gefnar upp um sáttina.