Forsætisráðherra drekkur eingöngu nýmjólk

Mjólkurfernur hafa nú fengið nýtt útlit í tilefni af hundrað ára afmæli fullveldi Íslands en á fernunum eru fróðleiksmolar um fullveldisárið 1918. Forsætisráðherra segist eingöngu drekka Ný mjólk.

Það er mikið að gera þessa dagana í mjólkurbúi MS á Selfossi því þar fer öll pökkun á mjólk fram, nú fullveldismjólk í nýju jólafernunum sem tileinkaðar eru aldarafmæli fullveldis Íslands.

„Þetta er um ýmsa atburði sem gerðust þetta viðburðaríka ár 1918, t.d. um hátíðarhöldin 1. desember 1918 og um Kötlugosið, Spænsku veikina, kosningaréttur kvenna og fleira og fleira. Þetta eru sex ólík skilaboð sem eru á fernunum“, segir Ragnheiður Jóna Ingimarsdóttir framkvæmdastjóri Fullveldisafmælis Íslands og bætir við að það hafi verið einstaklega ánægjulegt að vinna verkefnið með MS.

Til að fagna tímamótunum og nýju fernunum var að sjálfsögðu skálað í mjólk í mjólkurbúinu. Eftir það var haldið á Alþingi þar sem Katrín Jakobsdóttir, forsætisráðherra fékk fyrstu mjólkurfernurnar afhendar, ásamt upplýsingum í ramma um verkefnið og helstu staðreyndir þess. Boðið var upp á rjómapönnukökur með kaldri mjólk.

En er Katrín mikil mjólkurkona ?

„Nei, ég er það nú ekkert endilega, ég er meira fyrir aðrar mjólkurafurðir eins og osta, smjör og rjóma en mjólk með heitum kökum eða nýbökuðum pönnukökum er náttúrulega algjörlega frábær“.

En hvernig mjólk drekkur Katrín ?

„Nýmjólk“, segir hún ákveðin og þá var spurt hvort hún væri að reyna að fita sig ? Katrín hló og svaraði, „það er mikilvægt að byggja upp ákveðið fitulag en mér finnst hún bara best“.