Ættu ekki að láta hríðarveður og hálku koma sér í opna skjöldu

Í dag er búist við suðvestanhvassviðri eða -stormi talsverðri rigningu er spáð á vestanverðu landinu. Lengst af helst þó þurrt fyrir austan og hlýnar smám saman. Þar sem hiti er nærri frostmarki inn til landsins í morgunsárið má reikna með hríðarveðri á fjallvegum norðanlands fram að hádegi. Vegfarendur helgarinnar eru beðnir um að fylgjast vel með veðurspám. Þetta kemur fram í hugleiðingum veðurfræðings á vef Veðurstofu Íslands.

Þá dregur talsvert úr vindi og vætu í kvöld og nótt. Á morgun snýst hins vegar í norðvestanátt með skúrum og síðar éljum, en léttir til á Suðausturlandi. Þá hvessir talsvert fyrir austan annað kvöld og verður þá mjög hviðótt á sunnanverðum Austfjörðum. Jafnframt kólnar í veðri og hálka getur því myndast á vegum.

Sunnudagsspáin lítur vel út, að sögn veðurfræðings, með hægum vindi og svölu veðri. Vegfarendum helgarinnar er þó bent á að fylgjast vel með veðurspám og færð og ekki láta hvassviðri, hríðarveður eða hálku koma sér í opna skjöldu.

Veðurhorfur á landinu næstu daga:

Á laugardag:

Norðan og norðvestan 8-15 m/s og skúrir, en síðar él á N- og A-landi, en annars léttskýjað. Hiti 0 til 10 stig, hlýjast með S-ströndinni.

Á sunnudag:

Vestlæg eða breytileg átt, 5-10 m/s og yfirleitt léttskýjað, en vaxandi suðaustanáatt og þykknar upp SV-til um kvöldið. Hiti víða 2 til 6 stig, en vægt fost í innsveitum NA-til.

Á mánudag:

Suðaustan hvassviðri og talsverð rigning einkum S-lands, og hlýnandi veður, en vestlægari og skúrir um kvöldið. Hiti 1 til 8 stig, mildast syðst.

Á þriðjudag:

Norðaustlæg átt N-til, en vestlægari fyrir sunnan og víða skúrir eða él, en léttskýjað SA-lands. Hiti 1 til 6 stig.

Á miðvikudag:

Útlit fyrir vaxandi norðaustanátt með rigningu eða slyddu, einkum A-til.

Á fimmtudag:

Lítur út fyrir svala norðanátt með éljum N-til, en bjartviðri syðra.