Vindmylluævintýrið í Þykkvabæ gæti verið á enda

Framtíð raforkuframleiðslu í Þykkvabæ er í uppnámi því fyrirtæki sem og á og rekur tvær vindmyllur í bænum getur ekki endurnýjað þær innan núverandi deiliskipulags og tilraunir til að breyta deiluskipulagi hafa ekki borið árangur. Önnur vindmyllan er ónýt og hin hefur verið biluð í tvo mánuði. Sveitarstjóri Rangárþings ytra er svartsýnn á frekari uppbyggingu með vindmyllum.

Íslenska raforkufyrirtækið Biokraft gangsetti tvær vindmyllur í Þykkvabæ í júlí 2014 og voru þær fljótlega tengdar inn á landsnetið. Þær eru 74 metra háar með spaða í toppstöðu og því tæplega jafnháar Hallgrímskirkju sem er 74,5 metrar. Heildarafl þeirra er 1,2 megavött og hafa vindmyllurnar árlega framleiðslugetu upp á 4 gígavött.

Eldur kom upp í annarri vindmyllunni í júlí 2017 og eyðilagðist hún í brunanum. Steingrímur Erlingsson, eigandi Biokraft, taldi að elding hefði orsakað brunann og voru þær vangaveltur studdar áliti veðurfræðings. Íbúar á staðnum hafa hins vegar dregið þá skýringu í efa og er ekki fullvíst hvað orsakaði eldinn. Í maí á þessu ári bilaði svo hin vindmyllan og hefur því engin raforkuframleiðsla átt sér stað undanfarna tvo mánuði. Íbúar Þykkvabæjar velta því fyrir sér um þessar mundir hver sé framtíð raforkuframleiðslu á staðnum og hvort vindmylluævintýrið sé á enda.

Tilgangslausar brunarústir

Vindmyllurnar eru staðsettar í túnfætinum hjá Guðmundi Harðarsyni bónda í Önnuparti. Hann er ekkert sérstaklega hrifinn af því að vindmyllurnar standi þarna sem einhvers konar minnisvarði um háleita drauma sem fóru forgörðum og önnur sýnilega ónýt eftir brunann.

„Þetta plagar mann ekkert óskaplega ennþá en auðvitað viljum við ekki hafa þetta svona til eilífðar. Stopp og tilgangslaust og brunarústir þarna uppi,“ segir Guðmundur. 

Vilja fá einhverja niðurstöðu í málið

Gyða Árný Helgadóttir á og rekur Hótel Vos í Þykkvabæ. Hún hefur verið fremur neikvæð í garð vindmylluverkefnisins vegna hljóðmengunar sem fylgi vindmyllunum sem hún telur skaða upplifun ferðamanna á staðnum sem og íbúanna sjálfra. 

„Þetta er auðvitað hryllingur að horfa upp á þessa vindmyllu sem brann í fyrra. Það er ekki búið að taka þetta niður og við vitum ekkert hver staðan er. Maður vill í raun bara fá niðurstöðu í málið. Hvort þetta eigi að vera þarna eða hvort það standi til að taka þetta í burtu,“ segir Gyða. 

„Maður þarf bara að fara með æðruleysisbænina“

Vindmyllurnar eru frá danska fyrirtækinu Vestas og eru 21 árs. Biokraft vill endurnýja vindmyllurnar með nýrri tegund sem hefur lengri spaða. Biokraft hefur þegar keypt þessar nýju vindmyllur en getur ekki sett þær upp. Því til þess að það gangi eftir þarf að breyta deiluskipulagi og allar tilraunir til þess hafa mætt andstöðu íbúa og sveitarfélagsins Rangárþings ytra.

„Það eru sautján ár síðan hætt var framleiðslu á þessum vindmyllum. Að endurnýja þetta með eins myllum er eins og að endurnýja símann og kaupa nýjan Nokia 6110 síma í dag. Það er eiginlega ekki hægt. Plús það að tryggingafélag myndi ekki tryggja svona gamlar vindmyllur. Þessi tækni er úrelt og það verður að endurnýja þetta með einhverri nýrri tækni,“ segir Steingrímur Erlingsson eigandi Biokraft.  

Hvaða ætlarðu að gera fyrst þú færð ekki breytingar á deiluskipulagi í gegn? 

„Veistu það, ég veit það ekki. Maður þarf bara að fara með æðruleysisbænina. Þetta er ekki undir mér komið,“ segir Steingrímur.  

Biokraft hafði áform um uppsetningu á fleiri vindmyllum í Þykkvabæ og var vinna vegna skipulags komin talsvert á veg. Ágúst Sigurðsson sveitarstjóri Rangárþings ytra segist hins vegar ekki bjartsýnn á að það gangi eftir.

„Mér er það til efs. Mér finnst að þetta sé þannig að fólk setur mikla fyrirvara við það hvar vindmyllur, stórar myllur í það minnsta, eru staðsettar.“