Sigrún Edda kjörin formaður Heimilis og skóla

Sigrún Edda Eðvarðsdóttir er nýr formaður Heimilis og skóla – landssamtaka foreldra. Sigrún var kjörin á aðalfundi félagsins í gærkvöldi en hún tekur við formennsku af Önnu Margréti Sigurðardóttur, sem hefur verið formaður undanfarin fjögur ár. Jenný Ingudóttir, varaformaður, lauk einnig stjórnarsetu en hún hefur setið í stjórn samtakanna frá árinu 2011 

Fram kemur í tilkynningu frá samtökunum að Sigrún Edda sé fædd 20. júlí 1971. Hún er gift Eyþóri Páli Haukssyni, framkvæmdastjóra og eiga þau þrjú börn. Hún er með BA gráðu í uppeldis- og menntunarfræðum með félagsráðgjöf sem aukagrein og MS gráðu í mannauðsstjórnun. Sigrún Edda hefur setið í stjórn Heimilis og skóla frá árinu 2014. Hún hefur tekið virkan þátt í foreldrastarfi og verið formaður dómnefndar Foreldraverðlauna Heimilis og skóla síðastliðin tvö ár. Hún hefur auk þess verið formaður foreldrafélags Álftanesskóla í fjögur ár og formaður Grunnstoða, svæðasamtaka grunnskóla í Garðabæ í eitt ár auk þess að sitja í foreldraráði Fjölbrautaskólans í Garðabæ síðastliðin þrjú ár.

Á aðalfundinum var jafnframt kosið um um þrjú sæti í stjórn Heimilis og skóla en fjögur framboð bárust. Þröstur Jónasson gaf kost á sér til áframhaldandi stjórnarsetu en hann hefur setið í stjórn Heimilis og skóla frá árinu 2014 og var kosinn aftur. Eydís Heiða Njarðardóttir og Sigríður Arndís Jóhannsdóttir hlutu einnig kosningu. Nýja stjórn Heimils og skóla skipa nú:

Sigrún Edda Eðvarsdóttir, formaður, Garðabæ

Kristjana Þórey Guðmundsdóttir, Hafnarfirði

Eydís Heiða Njarðardóttir, Reykjavík

Inga Dóra Ragnarsdóttir, Árborg

Sigríður Arndís Jóhannsdóttir, Reykjavík

Þorvar Hafsteinsson, Kópavogi

Þröstur Jónasson, Kópavogi