Blautt og hvasst á kjördag

Veðurstofan gerir ráð fyrir að það verði blautt á landinu næstu daga. Spáð er samfelldri úrkomu suðaustan- og austanlands í dag og einnig um tíma fyrir norðan. Þá má jafnframt búast við skúraleiðingum vestantil á landinu. Vindur mun jafnframt aukast eftir því sem líður á daginn og hitinn verður yfirleitt á bilinu 5 til 13 stig.

Það verður svo „dæmigerð suðvestanátt með skúrum á morgun,“ eins og veðurfræðingur kemst að orði. Þó má búast við sólarglennum á milli skúraskýjanna. Einnig mun létta smám saman til norðaustanlands þar sem jafnframt mun hlýna örlítið.

Næsta lægð er þó ekki langt undan með vaxandi suðaustanátt og rigningu um landið vestanvert annað kvöld. Áframhaldandi suðlægar áttir verða ríkjandi um helgina, hvasst á köflum og vætusamt sunnan- og vestanlands, en hlýtt og að mestu þurrt um landið norðaustanvert.



Veðurhorfur á landinu næstu daga

Á laugardag:

Sunnan 10-18 m/s og talsverð eða mikil rigning á sunnan og vestanverðu landinu og hiti 8 til 13 stig, en hægari suðaustlæg átt norðaustanlands, úrkomulítið og hiti 12 til 19 stig. Dregur hægt úr vindi um kvöldið. 

Á sunnudag:

Sunnan og suðaustan 5-13 m/s, hvassast með suðvesturströndinni. Skýjað og rigning sunnan- og vestanlands, jafnvel talsverð um tíma en úrkomulítið austanlands. Hiti 8 til 17 stig hlýjast norðaustanlands. 

Á mánudag:

Fremur hæg breytileg átt, skýjað með köflum og fremur hlýtt, en fer að rigna vestantil seint um kvöldið. 

Á þriðjudag:

Suðaustlæg átt og rigning með köflum um landið vestanvert um morgunin en styttir upp síðdegis. Yfirleitt þurrt og bjart austantil en líkur á síðdegisskúrum. Áfram fremur hlýtt í veðri. 

Á miðvikudag:

Útlit fyrir hæga suðlæga átt, og bjartviðri víða um land en líkur á síðdegisskúrum austantil. Milt í veðri