Frjósemi kvenna á Íslandi aldrei minni

Frjósemi kvenna á Íslandi árið 2017 var minni en nokkru sinni fyrr. Þetta kemur fram á vef Hagstofu Íslands en þar segir að frjósemi í fyrra hafi verið 1,71. Þá hélt meðalaldur frumbyrja áfram að hækka og var 27,8 ár. Ef horft er til Evrópu var algengast að barn fæðist utan hjónabands á Íslandi.

Í fyrra fæddust 4.071 barn á Íslandi en það er fjölgun frá árinu 2016 þegar 4.034 börn fæddust. Alls fæddust 2.112 drengir og 1.959 stúlkur sem jafngildir 1.078 drengjum á móti hverjum 1.000 stúlkum.

„Helsti mælikvarði á frjósemi er fjöldi lifandi fæddra barna á ævi hverrar konu. Yfirleitt er miðað við að frjósemi þurfi að vera um 2,1 barn til þess að viðhalda mannfjöldanum til lengri tíma litið. Árið 2017 var frjósemi íslenskra kvenna 1,71 börn á ævi hverrar konu og hefur hún aldrei farið lægra frá því að mælingar hófust árið 1853. Árið 2016 var frjósemi 1,75 en það er næst lægsta frjósemi sem mælst hefur hér á landi. Undanfarinn áratug hefur frjósemi á Íslandi verið rétt um tvö börn á ævi hverrar konu.

Frjósemi á Íslandi hefur verið með því mesta sem þekkist í Evrópu á síðustu árum en árið 2016 var frjósemi undir tveimur í öllum löndum Evrópusambandsins. Frjósemi var að meðaltali 1,6 í 28 löndum Evrópusambandsins árið 2016, mest var hún í Frakklandi (1,92). Síðustu ár hefur fæðingartíðni innan álfunnar verið lægst í löndum Suður-Evrópu og er árið 2016 engin undantekning, en fæðingartíðni var 1,34 á Spáni og Ítalíu og 1,36 í Portúgal,“ segir á vef Hagstofunnar en nánar má lesa um málið á vef Hagstofunnar.