Borgarstjóra Tripoli rænt af heimili sínu

Abdelraouf Beitelmal, borgarstjóri Tripoli, er horfinn af heimili sínu en tvennum sögum fer af hvar hann er niðurkominn. Borgaryfirvöld segja að honum hafi verið rænt á meðan aðrir embættismenn segja að hann sé í gæsluvarðhaldi og verið sé að yfirheyra hann vegna ótilgreindra glæpa. BBC greinir frá.

Borgaryfirvöld í Tripoli, höfuðborg Líbíu, greina frá því að vopnaðir menn hafi tekið Abdelraouf af heimili sínu. Þá segja heimildarmenn tengdir fjölskyldu hans að menn vopnaðir byssum hafi ráðist inn á heimili hans rétt eftir miðnætti að staðartíma. Eiga þeir að hafa skotið á húsið áður en þeir fóru inn og því næst barið son hans með vopnum sínum.

Sediq AlSour, yfirmaður rannsóknardeildar hjá Dómsmálaráðuneytinu í Lýbíu, segir hins vegar í samtali við breska ríkisútvarpið BBC að borgarstjórinn sé í gæsluvarðhaldi og að verið sé að yfirheyra hann. AlSour gaf ekki frekari skýringar á gæsluvarðhaldinu.