Dagur hefur ákveðið að syngja á íslensku

Dagur Sigurðsson mun syngja lagið Stormur á íslensku á úrslitakvöldi Söngvakeppninnar sem fer fram í Laugardagshöll þann 3. mars. Þetta var kynnt á opinberri Facebook síðu keppandans rétt í þessu. Höfundur lagsins er Júlí Heiðar Halldórsson en hann samdi einnig textann ásamt Þórunni Ernu Clausen. 

„Við erum auðvitað stolt af íslenskunni og okkur finnst íslenski textinn sterkari en sá enski. Það má líka segja að veðurguðirnir hafi öskrað íslenska textann síðustu daga! Við höfum hátt og berjumst gegn óveðrum í alls konar myndum. Þetta þýðir að ef við sigrum þá mun íslenskan hljóma í eyrum Evrópubúa í Lissabon í maí, flutt af hinum magnaða Degi Sigurðssyni,“ segir í tilkynningunni.

Júlí Heiðar deildi fréttunum stoltur á sinni Facebook síðu þar sem hann sagði að það væri gaman ef íslenski textinn hans fengi að hljóma í sjónvarpstækjum Evrópubúa. 

Flutning Dags í undankeppninni má hlusta á í spilaranum hér fyrir neðan.