Lægðin brýnir kuta sína

Við Nýfundnaland er lægð að „brýna kutana sína á leið sinni til okkar,“ eins og veðurfræðingur hjá Veðurstofunni kemst að orði. Úrkomuskil frá henni ganga yfir landið aðra nótt með hvassviðri eða storm og snjókomu í fyrstu en síðar rigningu. Þegar að lægðin kemur nær landi verður vindur vestlægari og það kólnar, él vestantil en bjartviðri eystra.

Það má hins vegar gera ráð fyrir norðlægri átt í dag með éljagangi á norðanverðu landinu en bjartviðri sunnantil. Síðan mun ganga í norðvestan 18 til 23 m/s í nótt suðaustantil en yfirleitt 10 til 15 m/s á Norðaustur- og Austurlandi og enn hægari á vestanverðu landinu. Lægir og dregur úr éljum síðdegis á morgun, „og þar með kveður norðanáttin okkur í bili,“ segir veðurfræðingurinn. Frostið verður á bilinu 2 til 10 stig, kaldast inn til landsins.

Á sunnudag er svo útlit fyrir næstu djúpu lægð með hvössum vindi og rigningu, áður en það kólnar aftur á mándag með éljum vestantil. Svo eru líkur á að þriðja lægðin kemur upp að landinu á miðvikudag.

„Það eru því umhleypingarsamir tímar framundan, en bjartviðri og úrkomulítið í dag um landið suðvestanvert. Um að gera að njóta þess á meðan það varir.“

Veðurhorfur á landinu næstu daga

Á fimmtudag:

Norðlæg átt 8-15 m/s norðaustanlands og dálítil él, en annars hægari, bjartviðri og talsvert frost. Vaxandi suðaustanátt og þykknar upp síðdegis, fyrst suðvestantil. Hvassviðri eða stormur með snjókomu og síðar rigningu um kvöldið og hlýnar í veðri.

Á föstudag:

Sunnan 15-20 m/s, víða rigning og hiti 0 til 5 stig. Heldur hægari suðvestanátt þegar líður á daginn með éljum og kólnandi veðri en birtir til norðaustanlands.

Á laugardag:

Suðvestan 8-15 m/s og él sunnan- og vestantil, en bjartviðri austanlands. Hiti nálægt frostmarki.

Á sunnudag:

Gengur í sunnan hvassviðri eða storm með rigningu sunnan- og vestanlands en úrkomulítið um landið norðaustanvert. Hiti 2 til 7 stig, en fer kólnandi um kvöldið.

Á mánudag og þriðjudag:

Útlit fyrir suðvestan stormi með talsverðum éljagangi, en úrkomulítið og bjart með köflum austanlands. Frost um land allt.