Greiningardeild Arion banka leggur til að landsbyggðin fái bætur fari flugvöllurinn

Greiningardeild Arion banka leggur til að Reykjavíkur deili með sér þeim ábata sem myndi hljótast af því að færa Reykjavíkurflugvöll úr Vatnsmýri og að sanngirni yrði fólgin í því að landsbyggðin og aðrir sem treysta á flugvöllinn fái stóra sneið af þeirri köku. 

Þetta kemur fram í grein sem greiningardeild bankans vann.

Þar er færð frá málamiðlun í stóra flugvallarmálinu. Bent er á að Vatnsmýrin sé verðmætt byggingarland fyrir Reykjavíkurborg sem er sístækkandi en á sama tíma er flugvöllurinn nauðsynleg samgönguæð inn og út úr höfuðborginni. Er það talið mikilvægt út frá öryggis-, efnahags- og  byggðasjónarmiðum.

Í grein Arion banka kemur fram að sterkar vísbendingar séu um að það sé þjóðhagslega hagkvæmt fyrir heildina að flugvöllurinn víki. Augljóst sé þó að stór hluti fólks beri að óbreyttu einhverskonar skaða ef flugvellinum verði lokað.

„Lausnin felst þannig í því að þeir sem njóti góðs af, t.d. borgaryfirvöld, deili þeim ábata með sér með þeim sem bera skarðan hlut frá borði. Þannig myndast svigrúm til að tryggja öryggi sjúklinga og góðar samgöngur fyrir íbúa landsbyggðarinnar til Reykjavíkur svo eitthvað sé nefnt, á sama tíma og góð borg getur orðið betri,“ segir í grein Arion banka.

Þar kemur fram að samanlagt byggingarmagn í Vatnsmýri gæti orðið um 6.900 íbúðir og 600 þúsund fermetrar atvinnuhúsnæðis.

Fasteignaverð yrði meira en 30 prósentum hærra en á jaðri höfuðborgarsvæðisins sem myndi þýða að heildarfasteignamat í Vatnsmýri yrði um 143 milljörðum króna hærra en að jaðri höfuðborgarsvæðisins. Með öðrum orðum fengust um 143 ma.kr. meira fyrir þessar fasteignir í Vatnsmýrinni, miðað við þær forsendur sem bankinn gefur sér.

Leggur Arion banki til að Landsbyggðin og aðrir sem treysta almennt meira á flugvöllinn fái stóra sneið af þessari köku.

Hvað ætti að gera við þau verðmæti er annað mál að mati bankans, hvort sem það færi í nýjan innanlandsflugvöll, niðurgreitt innanlandsflug, auknar vegaframkvæmdir á landsbyggðinni, bætta heilbrigðisþjónustu úti á landi eða aukna notkun þyrluflugs í sjúkraflugi.

„Við höfum ekki svarið en hér að neðan er listi yfir kostnað við ýmsa þætti sem tengjast hugsanlegu lausnum og gætu þannig gefið hugmynd um hvernig verja mætti ábata af uppbyggingu í Vatnsmýrinni,“ segir að lokum í greininni.