Þórsarar úr leik eftir tap fyrir Ægismönnum

Matraðarbyrjun Þórsara á tímabilinu heldur áfram en í kvöld féll liðið úr leik fyrir 3. deildarliði Ægis á heimavelli í 32-liða úrslitum Borgunarbikars karla.

Þór situr á botni Inkasso-deildarinnar eftir tvö töp í fyrstu tveimur umferðunum og er núna dottinn út úr bikarkeppninni.

Ekkert mark var skorað í venjulegum leiktíma og framlengingu og því þurfti að grípa til vítaspyrnukeppni. Þar voru Ægismenn ískaldir og skoruðu úr öllum fimm spyrnum sínum á meðan Orri Freyr Hjaltalín brenndi af fjórðu spyrnu Þórs. Lokatölur 3-5 eftir vítakeppni.

Þrír aðrir leikir fóru fram í Borgunarbikarnum í kvöld.

Kolbeinn Kárason tryggði Leikni R. sigur á Þrótti R., 2-1, í leik tveggja Inkasso-deildarliða á Leiknisvelli.

Staðan var markalaus í hálfleik en á 50. mínútu kom Skúli E. Kristjánsson Sigurz, lánsmaður frá Breiðabliki, Leikni yfir með sínu fyrsta marki fyrir félagið. Tíu mínútum síðar jafnaði Þróttur metin með sjálfsmarki Halldórs Kristins Halldórssonar.

Þegar fjórar mínútur voru til leiksloka skoraði Kolbeinn svo sigurmark Leiknis með skalla eftir hornspyrnu Ragnars Leóssonar.

Selfoss, topplið Inkasso-deildarinnar, þurfti að hafa mikið fyrir því að vinna 3. deildarlið Kára á heimavelli. Lokatölur 3-2, Selfossi í vil.

Selfyssingar byrjuðu leikinn betur og eftir korter var staðan orðin 2-0, heimamönnum í vil. Alfi Conteh Lacalle og James Mack skoruðu mörkin.

Káramenn gáfust ekki upp og jöfnuðu metin með mörkum Andra Júlíussonar og Arnórs Snæs Guðmundssonar.

Þegar tvær mínútur voru eftir af venjulegum leiktíma skoraði Elvar Ingi Vignisson sigurmark Selfyssinga með skalla eftir fyrirgjöf frá Giordano Pantano.

Grótta lenti undir gegn 3. deildarliði Berserkja  en kom til baka og vann 1-4 sigur.

Karel Sigurðsson kom Berserkjum yfir á 7. mínútu en aðeins tveimur mínútum síðar jafnaði Viktor Smári Segatta metin. Jóhannes Hilmarsson, Agnar Guðjónsson og Viktor Smári bættu svo við mörkum og Seltirningar eru því komnir áfram í 16-liða úrslit.

Upplýsingar um úrslit og markaskorara eru fengnar frá Fótbolta.net.