Tækifærin verða í boði á Algarve – og engar afsakanir

Stelpurnar okkar í kvennalandsliðinu í fótbolta hefja leik á Algarve-mótinu í dag en fyrsti mótherjinn er firnasterkt lið Noregs. Noregur er í ellefta sæti heimslistans, níu sætum fyrir ofan Ísland, og hefur verið stórveldi í Evrópu um margra ára skeið.

Hinir leikirnir tveir í riðlakeppninni eru á móti Japan, sem spilaði til úrslita á HM í Kanada fyrir tveimur árum, og svo Spánn sem er eitt best spilandi lið Evrópu. Algarve-mótið er einn stærsti liður stelpnanna í undirbúningi fyrir EM 2017 í Hollandi í sumar en nú styttist með hverjum degi í stóru stundina.

Mismunandi hlutverk

„Það er ýmislegt sem við viljum fá fram núna á þessu móti. Það er þröngt spilað á fáum dögum og margir topp leikir. Við munum, eins og áður, rúlla á liðinu og ég mun setja leikmenn í mismunandi hlutverk. Ekki endilega mismunandi leikstöður heldur fá mismunandi ábyrgð og er spenntur að sjá hvernig leikmenn bregðast við því að fá stærra hlutverk en áður,“ segir Freyr Alexandersson landsliðsþjálfari.

Stelpurnar prófuðu sig áfram með 3-5-2 leikkerfið á móti í Kína í vetur og það verður einnig notað núna.

„Þetta leikkerfi gekk vel þar að mörgu leyti á meðan við höfðum orku í það. Það var rakt loft í Kína og mér fannst liðið þreytt á þessum tíma. Það hélt vel á meðan við vorum með ferska fætur. Ég mun prófa það aftur og mun, eftir að hafa greint leikina, breyta tæknilegum útfærslum. Við munum prófa það á móti Japan þannig að það verður spennandi að sjá hvort við förum lengra með það eða látum staðar numið eftir Algarve,“ segir Freyr.

Nú er að grípa gæsina

Byrjunarlið Íslands var mjög fastmótað í undankeppni EM í Hollandi og virtust engar dyr standa opnar fyrir stelpurnar sem biðu þolinmóðar en hungraðar á varamannabekknum. Nú eru aftur á móti skörð höggvin í liðið vegna meiðsla Dagnýjar Brynjarsdóttur (sem eru ekki alvarleg), Margrétar Láru Viðarsdóttur (var í aðgerð) og Hólmfríðar Magnúsdóttur sem er fótbrotin.

„Þarna eru þrjár stöður strax sem hægt er að berjast um. Auðvitað er Margrét á löppum og vonandi nær hún fullum styrk. Harpa Þorsteinsdóttir átti svo barn fyrir sólarhring þannig hún gæti orðið klár. Hinar stelpurnar geta gripið gæsina. Þær fá tækifæri til þess. Það eru mörg teikn á lofti um að leikmenn ætli sér að grípa gæsina. Ég sé það alveg á æfingum og á leikjunum sem þær hafa verið að spila heima,“ segir Freyr, en hefur hann verið að pred­ika fyrir leikmönnum að nýta ferðina til að koma sér í liðið?

„Ég held ég þurfi ekki beint að segja það. Stelpurnar eru klárar.“

Engar afsakanir

Aðeins þrír leikmenn úr „hefðbundnu“ byrjunarliði Íslands undanfarin misseri byrja leikinn í dag. Ungar stelpur og aðrar sem hafa beðið eftir tækifæri til að fá að láta ljós sitt skína.

„Þetta er ungt og ferskt lið. Það er ekki óreynt en reynslan er ekki mikil. Margar af þessum stelpum komu vel út í mælingum í vetur og ég hlakka til að sjá þær gegn alvöru liði. Það besta við þetta Algarve-mót er að fá þessa alvöru leiki. Ég fæ núna tækifæri til að gefa þessum stelpum sénsinn gegn sterkum mótherja og fæ svör við mínum spurningum. Það verða engar afsakanir,“ segir Freyr sem gefur til dæmis Eyjastúlkunni Sigríði Láru Garðarsdóttur tækifæri í stað Dagnýjar Brynjarsdóttur.

„Mig langar að sjá hvort hún geti fyllt í skarð Dagnýjar er varðar líkamlega þáttinn og föstu leikatriðin. Hún er á svona þriggja manna sláttuvélamiðju hjá mér sem mig langar að prófa gegn jafn líkamlega sterkum andstæðingi og Noregi. Sara verður fyrir aftan en Gunnhildur færist aðeins framar og tekur hlaupin inn á teiginn sem Dagný hefur vanalega gert. Það verður gaman að sjá hvernig stelpurnar nýta þetta tækifæri,“ segir Freyr Alexandersson.