Zayn hannar fyrir Versace

Fyrrum One Direction söngvarinn Zayn kemur til með að hanna línu fyrir Versus Versace, undirmerki Versace. Þetta tilkynnti hann ásamt Donatellu Versace, yfirhönnuði Versace, í dag. Hann mun einnig sitja fyrir í tveimur auglýsingaherferðum fyrir merkið. 

Versus Versace hefur verið án yfirhönnuðar frá því að Anthony Vaccarello var ráðinn til Saint Laurent fyrr á þessu ári. Það er óhætt að segja að Zayn uppfylli ímynd merkisins en það dregur mikinn innblástur frá rokktónlist og er svarti liturinn oftast áberandi sem og leður.

Línan mun heita Zayn x Versus og verður kynnt fyrir aðdáendum næsta vor. Miðað við hvernig fatastíl söngvarinn er með þá efumst við ekki um að samvinnuverkefnið muni slá í gegn. Svo er auðvitað líka spurning hvort að hann fái einhverja hjálp frá kærustunni, Gigi Hadid.