Halla: Ekki búið fyrr en að feita konan syngur

Halla Tómasdóttir bætir miklu fylgi við sig í nýrri skoðanakönnun Fréttablaðsins, Stöðvar 2 og Vísis en þar mælist hún með stuðning 19,6 prósenta þeirra sem afstöðu taka í könnuninni og bætir við sig tíu prósentustigum frá könnuninni í síðustu viku.

„Þetta er ekki búið fyrr en að feita konan syngur og ég get alveg staðið undir því,“ sagði Halla í kappræðum forsetaframbjóðenda á Stöð 2 í kvöld. Vitnaði hún til dramatísks sigur íslenska landsliðsins í knattspyrnu gegn Austurríki á EM í Frakklandi í gær.

„Ég var á Ingólfstorgi í gær og ég var ekki viss um að við höfum trúað því í eina mínútu að við myndum vinna leikinn en þremur sekúndum fyrir leikslok gerðum við það. Ég ætla að spila leikinn alla leið og það á ekki að blása hann af fyrr en leikurinn er búinn,“ sagði Halla.