Spænski tölfræðingurinn Alexis Martín-Tamayo hefur nú reiknað út efstu 60 sætin á listanum sem Alþjóðaknattspyrnusambandið mun gera opinberann 7. apríl næstkomandi.
Íslenska karlalandsliðið var í 38. sæti á síðasta lista FIFA sem kom út 3. mars síðastliðinn en mun hækka um þrjú sæti á nýjum lista og verður í 35.sæti.
Íslenska liðið tapaði 2-1 fyrir Dönum en vann 3-2 sigur á Grikklandi frá því að listinn var síðast tekinn saman.
Landar Lars Lagerbäck í Svíþjóð voru fjórum sætum ofar en Ísland á marslistanum en þeir detta niður um tvö sæti og eru núna í 36.sæti eða einu sæti neðar en Ísland.
Danir voru í 40. sætinu á listanum í mars en lækka um sæti þrátt fyrir sigurinn á Íslendingum. Danir töpuðu á móti Skotlandi í hinum leik sínum í þessu landsleikjahléi.
Ísland var síðast best á Norðurlöndum á listanum sem var gefinn út nóvember 2015 en þá var Ísland í 31.sæti , fjórum sætum á undan Dönum sem voru næstir.
Svíar voru þá komnir niður í 45. Sæti en þeir hækkuðu sig um tíu sæti á næsta lista á eftir og hafa verið efstir á Norðurlöndum undanfarna fjóra mánuði.
Ísland var einnig með besta landslið Norðurlanda í júlí, ágúst og október í fyrra sem og í október árið 2014.
Argentína tekur fyrsta sætið af Belgíu á FIFA-listanum sem verður gefinn út á fimmtudaginn og bæði Síle og Kólumbía komast fyrir Spán og Þýskaland. Brasilíumenn lækka um eitt sæti og er núna í sjöunda sæti listans.
Como os habéis portado muy bien, os voy a regalar el TOP-60 del próximo Ranking FIFA q se publicará el 7-Abril ;-) pic.twitter.com/FLrnHbfoSX
— MisterChip (Alexis) (@2010MisterChip) April 1, 2016
