Cerrone vann uppgjör kúrekanna

Donald Cerrone byrjaði feril sinn í veltivigt UFC með stæl í nótt.

Þá mætti hann Alex Oliveira og kláraði hann í fyrstu lotu. Cerrone er frægur fyrir spörkin sín og högg en hann kláraði Oliveira með uppgjafartaki. Minnti á að hann er líka sterkur í gólfinu.

Báðir bardagamenn kalla sig kúreka en það gekk bara annar þeirra stoltur úr búrinu með kúrekahattinn í gær.

Cerrone er sannkallaður iðnaðarmaður í UFC og keppir nánast í hverjum mánuði. Hann tapaði síðast fyrir heimsmeistaranum í léttvigt, Rafael dos Anjos, í fyrstu lotu og ákvað því að byrja upp í nýtt í veltivigtinni sem er sami þyngdarflokkur og Gunnar Nelson er í.

Óvissa er þó um hvort Cerrone ætli að halda áfram að berjast í veltivigtinni en byrjunin þar lofar þó góðu.