Auddi skemmdi töfluna hjá Nantes er hann skrifaði skilaboð til Kolbeins

Kolbeinn Sigþórsson var til umfjöllunar í síðasta þætti sjónvarpsþáttaraðarinnar Atvinnumennirnir okkar í umsjón Auðuns Blöndal á Stöð 2  á sunnudagskvöldið.

Kolbeinn leikur knattspyrnu með franska liðinu Nantes og hefur verið þar frá því síðasta sumar. Áður var hann hjá Ajax í Hollandi og sló rækilega í gegn hjá hollenska liðinu. Í Frakklandi hefur ekki gengið eins vel og hann verið í vandræðum með að finna markanefið.

Hjá Nantes er hefð fyrir því að leikmenn hittist á fundi á hóteli fyrir leiki og ræði málin. Á meðan Kolbeinn fór á fundinn fékk Auðunn Blöndal að skoða völlinn, búningsherbergið og aðstæðurnar sem leikmenn Nantes búa við. Inni í búningsklefanum er tafla og greip Auðunn í tússpenna og krotaði á hana „Áfram Kolbeinn, kv. Auddi“ á töfluna.

Svo þegar hann ætlaði sér að stroka þetta út kom í ljós að um „permanent marker“ að ræða og skilaboðin því föst á töflunni. Í samtali við Vísi segist Auðunn hafa fengið Snapchat frá Kolbeini töluvert síðar og enn stóðu skilaboðin á töflunni.