Bardagakappinn Gunnar Nelson var valinn íþróttamaður ársins af lesendum Vísis en kosning á milli þeirra tíu íþróttamanna sem hlutu flestar tilnefningar lesenda vefsins stóð yfir um hátíðarnar. Um tvö þúsund manns tóku þátt í kosningunni og hlaut Gunnar ríflega fjórðung atkvæðanna.
„Það eru gleðifréttir og gaman að því,“ sagði Gunnar af sinni alkunnu hógværð í samtali við íþróttadeild. Hann segir að árið hafi verið gjöfult og gott fyrir sig.
„Það voru margir bardagar á árinu og svo eignaðist ég lítinn son. Það stendur auðvitað upp úr hjá mér,“ segir Gunnar sem barðist þrívegis á árinu. Hann bar sigurorð af Omari Akhmedov og Zak Cummings en tapaði svo heldur óvænt fyrir Rick Story í síðasta bardaga ársins. Það var hans fyrsta tap sem atvinnumaður í blönduðum bardagalistum.
„Ég er mjög sáttur við árið. Tapið gerir ekkert annað en að færa mig upp á næsta getustig enda þurfum við allir að ganga í gegnum svona lagað. Ég kann að meta þá leið sem fyrir mér liggur og þetta er alltaf spurning um hvað maður tekur með sér úr svona aðstæðum inn í næstu verkefni,“ segir Gunnar sem stefnir að því að berjast næst annað hvort í lok febrúar eða byrjun mars.
„Það er þó ekkert ákveðið með staðsetningu eða andstæðing en það stefnir allt í það,“ segir Gunnar sem barðist síðast í byrjun október. Hann hefur notið þess að vera í fríi og verja tíma með ungri fjölskyldu sinni.
„Ég barðist einu sinni rétt áður en hann fæddist og svo komu tveir bardagar fljótlega eftir það. Það var því nokkuð mikið að gera og gott að geta leyft hlutunum að jafna sig aðeins,“ segir Gunnar sem á sér engan sérstakan óskaandstæðing.
„Mér er nokkuð saman hverjum ég mæti næst. Flestallir eru sterkir og verðugir andstæðingar og ég efast ekki um að ég fái einn slíkan í næsta bardaga,“ segir Gunnar.
Ítarlegt viðtal við Gunnar verður að finna á íþróttavef Vísis í dag.
Valur
Vestri
