Björg fylgir Helgu til Grindavíkur

Körfuboltakonan Björg Guðrún Einarsdóttir er gengin í raðir Grindavíkur frá KR og mun leika með Suðurnesjaliðinu í Domino's deild kvenna í vetur. Þetta kemur fram á grindavik.net.

Björg, sem er 23 ára, er 1,65 metra hár bakvörður og fín þriggja stiga skytta.

Björg var með 12,7 stig, 4,6 fráköst og 3,7 stoðsendingar að meðaltali í leik með KR í fyrra en Vesturbæjarliðið hefur sem kunnugt er hætt við að senda lið til leiks í Domino's deildinni í vetur.

Björg er annar leikmaður KR sem gengur í raðir Grindavíkur en fyrr í vikunni skrifaði Helga Einarsdóttir, fráfarandi fyrirliði KR, undir samning við Grindavík.

Grindavík endaði í 4. sæti Domino's deildarinnar í fyrra en tapaði fyrir Íslandsmeisturum Snæfells í undanúrslitum úrslitakeppninnar.