Frelsissvipting í Vogum á Vatnsleysuströnd: Piltinum hótað lífláti ef hann segði frá

Fjöldi manns hefur komið og borið vitni í Héraðsdómi Reykjaness í morgun en þar fer fram aðalmeðferð í nokkrum málum þar sem Kristján Markús Sívarsson er ákærður.

Í einu málanna er Kristján ákærður ásamt Marteini Jóhannssyni og Ríkharði Júlíusi Ríkharðsson fyrir líkamsárás og frelsissviptingu á heimili fórnarlambsins Kópavogi í febrúar í fyrra.

Þá er Kristján jafnframt ákærður ásamt tveimur 19 ára drengjum fyrir líkamsárás og frelsissviptingu gegn 18 ára pilti í húsnæði í Vogum á Vatnsleysuströnd í fyrra. Faðir Kristjáns, Sívar Bragason, kom fyrir dóminn í dag og kom þá fram að Sívar er með lögheimili í umræddu húsi þar sem meint árás átti sér stað.

Sprautunálar á víð og dreif og mikið af smjörsýru

Lögreglumaður sem kom á vettvang í Vogunum og skrifaði frumskýrslu í málinu sagði mikla óreiðu og óþrifnað hafa verið í húsinu. Þá hafi sprautunálar verið víðs vegar um húsið auk þess sem lögreglan fann rafbyssu og haglabyssu. Þar að auki var mikið af smjörsýru í hylkjum á staðnum að sögn lögreglumannsins og blóðblettir hér og þar.

Pilturinn sem kærði árásina hélt því meðal annars fram fyrir dómi á föstudaginn að hann hefði fengið rafstuð í kynfæri með þeim afleiðingum að hann pissaði á sig, hann hafi verið látinn sleikja frunsu á Kristjáni og drekka átta flöskur af smjörsýru.

„Eins og maður sem er að sleppa úr höndum mannræningja”

Bæði faðir piltsins og lögreglumennirnir sem tóku á móti honum þegar hann kom á lögreglustöðina eftir árásina voru sammála um að pilturinn hafi verið í miklu uppnámi.

Faðir piltsins lýsti því að sonur hans hefði hringt í hann um hádegisbil og beðið hann um að koma að sækja sig.

„Hann var bara í sjokki. Ef ég man rétt þá sagði hann “Þeir ætla að drepa mig.” [...] Ég bruna á Miklubrautina, rétt hjá Hagkaup, og þar er hann eins og maður sem er að sleppa úr höndum mannræningja; í rusli,” sagði pabbi piltsins.

Hann sagði son sinn hafa lýst því sem hafði gerst; að hann hefi verið tekinn upp í bíl eftir miðnætti og keyrður í áttina til Keflavíkur. Þar hafi hann verið pyntur, sprautað í hann einhverjum óþverra og hann látinn drekka einhvern óþverra.

Fór í meðferð til að forðast árásarmennina

„Hann var þarna eitthvað skemmtiatriði og honum var hótað því að hann yrði drepinn ef hann myndi segja frá þessu. Hann var í miklu áfalli. [...] Hann þorði ekki út úr húsi í tvær vikur. [...] Hann var mjög óttasleginn og hræddur um að hótununum yrði framfylgt.”

Fram hafði komið við skýrslutöku yfir piltinum að hann hefði farið í meðferð í kjölfar árásarinnar. Aðspurður um við hverju hann fór í meðferð sagði faðir hans það vera einkamál sonarins en sagði þó þetta:

„Hann fór fyrst og fremst í meðferð af því hann óttaðist að vera á ferðinni, til að forðast það að þessir menn myndu geta náð í hann.”

„Óð um eins og dýr í búri”

Einn af lögreglumönnunum sem tók á móti piltinum og föður hans á lögreglustöðinni í Grafarholti sagði piltinn hafa verið í rosalegu uppnámi og varla viðræðuhæfan til skýrslutöku. Hann hafi grátið á milli þess sem það kom í slitrum hvað hefði komið fyrir.

Aðspurður hvort að pilturinn hefði verið í miklu eða litlu uppnámi sagði lögreglumaðurinn:

„Já, það er ekki oft sem maður sér fólk í svona uppnámi. Hann grét bara sáran, féll á hækjur sér og setti höfuðið í hendur sér og óð um eins og dýr í búri. [...] Það var augljóst að hann hafði orðið fyrir einhverju.”