Dæmdur í fimmtán ára keppnisbann

Það er tekið misalvarlega á lyfjamálum í íþróttum en það er ekkert rúm fyrir svindl í tennis.

Bandaríkjamaðurinn Wayne Odesnik hefur nefnilega verið dæmdur í 15 ára keppnisbann. Ferli þessa 29 ára tenniskappa er þar með lokið.

Þetta er í annað sinn sem hann fellur á lyfjaprófi. Hann var dæmdur í tveggja ára bann árið 2010 fyrir að nota vaxtarhormón. Að þessu sinni var hann tekinn með stera í líkamanum.

Odesnik, sem var númer 267 á heimslistanum, hefur þegar tilkynnt að hann hafi lagt skóna á hilluna. Eins og hann hafi þurft þess sérstaklega.

Félagar hans í tennisheiminum hafa sent honum kaldar kveðjur.

„Bless, bless Wayne. Farið hefur fé betra," skrifaði Andy Murray á Twitter meðal annars.