Af hverju er Patrekur alltaf með "teipið“ á fingrunum?

Patrekur Jóhannesson var alls ekkert spældur yfir því að Austurríki náði ekki að sigra Makedóníu í síðasta leiknum í B-riðlinum. Makedónía vann 36-30.  Vendipunkturinn í leiknum var þegar leikstjórnandinn Vytautas Ziura fékk beint rautt spjald þegar 5 mínútur voru búnar af seinni hálfleik.  Þá var staðan 19-18, Austurríki í vil.  Makedóníumenn náðu fimm marka forystu á næstu 5 mínútum og unnu öruggan sigur.  Makedónía mætir Slóvenum í 16 liða úrslitum en Austurríki keppir við Katar.

„Það var vont að missa Ziura af velli. Hann er gríðarlega mikilvægur fyrir okkur. Við prófuðum nýtt varnarafbrigði sem við reyndum fyrst gegn Íslendingum í apríl og höfum verið að æfa inná milli. Það gekk fínt en síðan lendum við þessum brottvísunum í byrjun seinni hálfleiks og það er vont gegn liði eins og Makedóníu.  Þeir spila yfirtöluna einna best af liðunum á þessu móti og hafa gert undanfarin ár," segir Patrekur.

Þið voruð sendir í skammarkrókinn hvað eftir annað í seinni hálfleik.

„Já dönsku dómararnir voru mjög sérstakir, ég skyldi þá ekki og ég held að þeir hafi  vitað hvað þeir voru að gera sjálfir. En þetta er hluti af þessu, maður má ekki láta þetta fara í taugarnar á sér," segir Patrekur.  

Þú gast fengið Slóveníu með sigri en sigur uppi með heimamenn í Katar, er það gott eða vont?

„Það er bara gott, Slóvenía er með frábært lið og Katarar eru búnir að spila frábærlega svo ég held að það hafi ekki skipt neinu máli.  Okkur var spáð því að við kæmust ekki upp úr riðlinum.  Við skákuðum Bosníu og Íran og að við séum í þriðja sæti eftir riðlakeppnina er mjög gott," segir Patrekur.  

Eru þínir menn orðnir saddir eða viljið meira?

„Við erum ekkert orðnir saddir, alls ekki. Aðalatriðið var að komast í 16 liða úrslit og við vitum það að við getum spilað fanta góðan handbolta.  Ég er ánægðastur með karakterinn og hjartað í liðinu.  Við erum að spila góðan og hraðan bolta á köflum og það er góður kraftur í liðinu.  Bæði í sókn og vörn erum við að spila góðan handbolta. Það koma kaflar inná milli sem eru ekki jafngóðir en ég er ánægður með mitt lið," segir Patrekur.  

Af hverju ertu alltaf með „teipið“ á fingrunum í leikslok?

„Það er farið núna, ég hefði kannski átt að horfa meira á það í leiknum.  Þetta kemur frá vini mínum Jóhanni Inga. Það á að reyna að minna mig á að einbeita mér að leiknum en ekki dómurum.  Ég hefði kannski átt að horfa meira á „teipið“ í dag," segir Patrekur.

Það er hægt að sjá allt viðtalið við Patrek í spilaranum hér fyrir neðan.

Ekki missa af neinu sem gerist á HM. Fylgdu Vísi á Twitter, Facebook og Snapchat (notendanafn: sport365).