Kennslustund Bales nýttist landsliðinu okkar vel

Íslenska landsliðið kemur aftur saman í dag 28 dögum eftir að liðið vann stórkostlegan sigur á bronsliði Hollendinga á Laugardalsvellinum. Fram undan er vináttuleikur við sterkt lið Belga á miðvikudaginn og fjórum dögum síðar er síðan toppslagur við Tékka í undankeppni EM.

Þjálfararnir lýstu yfir ánægju sinni með varnarleikinn á blaðamannafundi fyrir helgi og þeir mega monta sig af honum.

Lars Lagerbäck og Heimir Hallgrímsson höfðu ekki aðgengi að öllum leikmönnum í fyrsta leik ársins á móti Svíum í Abú Dabí í janúar en fyrsti landsleikur ársins með fullt lið var í Wales í mars.

Garteh Bale, einn besti knattspyrnumaður heims, fór illa með strákana í Cardiff 5. mars en hann skoraði eitt mark og lagði upp hin tvö í 3-1 sigri velska landsliðsins. Tapið var vissulega smá áfall fyrir íslenska liðið eftir ævintýrið haustið á undan enda Wales neðar á FIFA-listanum.

Það er samt óhætt að segja að Lars, Heimir og strákarnir hafi lagað varnarleik liðsins eftir kennslustundina hjá Bale. Íslenska liðið fékk á sig þrjú mörk á 90 mínútum í Cardiff en hefur síðan aðeins fengið á sig 1 mark á 450 mínútum.

Íslenska liðið hélt hreinu í seinni hálfleik í vináttulandsleik á móti Austurríki og síðan allar 90 mínúturnar í vináttuleik gegn Eistlandi í byrjun júní. Íslenska liðið hefur síðan haldið hreinu í fyrstu þremur leikjum sínum í undankeppni EM 2016.

Nú er svo komið að það eru liðnar 422 mínútur síðan Ísland fékk á sig mark í A-landsleik og á sama tíma hafa strákarnir okkar skorað 10 mörk í röð án þess að mótherjarnir hafi náð að svara fyrir sig.

Það reynir á liðið gegn Belgum sem eru með fjórða besta landslið heims samkvæmt FIFA-listanum og fullt af fljótum og leiknum leikmönnum sem geta strítt íslensku strákunum.

Byrjunarliðið hefur verið óbreytt í fyrstu þremur leikjum undankeppninnar en aðrir leikmenn eiga að fá tækifæri í Belgíuleiknum.

Hvort það breyti öllu eða nýju mennirnir nái að halda íslenska markinu áfram hreinu kemur í ljós á miðvikudagskvöldið.

Varnarmenn Íslands á þessum 422 mínútum

Markverðir

Hannes Þór Halldórsson    332 mínútur

Gunnleifur  Gunnleifsson    45 mínútur

Ögmundur Kristinsson    45 mínútur

Hægri bakverðir

Theódór Elmar Bjarnason    360 mínútur

Birkir Már Sævarsson    62 mínútur

Miðverðir

Ragnar Sigurðsson    360 mínútur

Kári Árnason    287 mínútur

Sölvi Geir Ottesen    105 mínútur

Hallgrímur Jónasson    92 mínútur

Vinstri bakverðir

Ari Freyr Skúlason    377 mínútur

Birkir Már Sævarsson    45 mínútur

------

Íslenska liðið eftir tapið á móti Wales í marsmánuði:

Mínútur spilaðar         450

Mörk skoruð            10    

Mörk fengin á sig        1

Mínútur yfir í leikjunum    212

Mínútur undir í leikjunum    18

------

Hreint íslenskt mark í 422 mínútur

62 mínútur    eftir 1-1 jafntefli við Austurríki

152 mínútur    eftir 1-0 sigur á Eistlandi

242 mínútur    eftir 3-0 sigur á Tyrklandi

332 mínútur    eftir 3-0 sigur á Lettlandi

422 mínútur    eftir 2-0 sigur á Hollandi

Íslenska landsliðið hafði lengst áður haldið marki sínu hreinu samfellt í 250 mínútur í þjálfaratíð Lars Lagerbäck en því náði liðið árið 2012.