Lagerbäck fagnar fáum spjöldum hjá Strákunum okkar

Lars Lagerbäck, annar þjálfara íslenska landsliðsins, er mjög ánægður með að leikmenn íslenska liðsins hafa ekki fengið mörg spjöld í fyrstu þremur leikjum íslenska liðsins í undankeppni EM.

Íslenska liðið er á toppi síns riðils en liðið hefur náð í 9 stig af 9 mögulegum og er auk þess með markatöluna 8-0.

„Við höfum spilað fimm leiki árið 2014 og haldið hreinu í fjórum þeirra. Það er frábær árangur," sagði Lars Lagerbäck á blaðamannafundinum í dag þar sem hann kynnti lið sitt og Heimis Hallgrímssonar fyrir leikina við Belga og Tékka.

 

„Fá einstaklingsmistök og frábært viðhorf eins og alltaf. Virkilega gott líka hversu fá gul spjöld við höfum fengið," sagði Lagerbäck.

Íslenska liðið hefur bara fengið tvö gul spjöld í fyrstu þremur leikjunum en það eru bara Gylfi Þór Sigurðsson og Ari Freyr Skúlason sem hafa náð sér í spjald.

Gylfi Þór og Ari Freyr fara því í leikbann fái þeir annað spjald en enginn annar leikmaður íslenska liðsins er á hættusvæði.